Alma importyn almastyrý úshin 12,5 myń gektar alańda baq ósiriledi. Bul týraly Aýyl sharýashylyǵy ministri Saparhan Omarov málim etti, dep habarlaidy QazAqparat.
«Alma óndirý kólemi sońǵy 3 jyl ishinde 15 paiyzǵa (188 myń tonnadan 216,5 myń tonnaǵa) ulǵaidy. Otanymyzda óndirilgen almamen qamtamasyz etilý kólemi 63 paiyzdy qurady. Alma importyn almastyrý úshin 2024 jylǵa qarai qosymsha 12,5 myń gektar alańda baq ósiriletin bolady, olar 105 myń tonna alma óndirýge múmkindik beredi», - dedi ministri Parlament Májilisindegi Úkimet saǵatynda.
Budan bólek S. Omarov qant ónerkásibin damytý úshin qoldaýdyń júieli sharalary qabyldanyp jatqanyn atap ótti.
«Qant qyzylshasyn óndirý 345 myń tonnadan 486 myń tonnaǵa deiin ulǵaidy, túsimdilik gektaryna 285 tsentnerden 325 tsentnerge deiin ósti. Elimizde óndirilgen qantpen qamtamasyz etilý kólemi 7 paiyzdan 14 paiyzǵa deiin ósti. Shikizat bazasyn damytý josparlanýda, bul rette qant qyzylshasynyń egis alańdaryn keńeitýdi qosymsha sýarmaly jerlerdi qalpyna keltirý jáne soltústik óńirlerde qant salasyn damytý esebinen júzege asyrý kózdelýde. Jumys istep turǵan zaýyttar jańǵyrtylyp, Jambyl men Pavlodar oblystarynda jalpy qýaty jylyna 216 myń tonna qant óndiretin 2 jańa qant zaýyty paidalanýǵa beriletin bolady», - dedi ministr.
Budan buryn habarlanǵandai, Májilistegi Úkimet saǵatynda Aýyl sharýashylyǵy ministri Saparhan Omarov qai ónimder importtalatynyn aitty.
Sonymen qatar vedomstvo basshysy elimizde shamamen 5,8 mln tonna sút óndirilgenimen, sút zaýyttarynyń júktelýi qazir shamamen 65 paiyzdy qurap turǵanyn jetkizdi.
