Órt sóndirýshiler Alma-Arasan shatqalynan shyqqan órtti oqshaýlady, dep habarlaidy "Ult aqparat".
«Búgin 21 qazan kúni tańǵy saǵat 5:46- da Almaty qalalyq Tótenshe jaǵdailar departamentiniń tabiǵi órtterge jedel áreket etý jasaǵy ekoposttyń joǵary jaǵyndaǵy Alma-Arasan shatqalyna shaqyrý boiynsha joǵary deńgeige jiberildi. Kirý joldarynyń joqtyǵynan jasaq jaiaý júrdi. Oqiǵa ornyna jetkende taýdyń basynda, 1,5 gektar aýmaqta qýraǵan aǵashtar men shyrshalar janyp jatqan. Birden Soltústik, ońtústik-shyǵys jáne batys jaǵynan 3 órt sóndirý alańy ornalastyryldy. Qyzyl jalyndy aýyzdyqtaý úshin «Ermak» órt sóndirgish quraly qoldanyldy», – dep habarlady vedomstvadan.
Shuǵyl qabyldanǵan sharalardyń arqasynda, saǵat 08: 02-de ońtústik-shyǵys pen batys jaǵy órtten oqshaýlandy.
Órtti sóndirýge 71 qyzmetker jumyldyryldy. Olardyń ishinde 30 órt sóndirýshi, 7 tehnika bar.
Qazirgi ýaqytta ottyń jeke oshaqtaryn sóndirý jumystary jumystary júrgizilýde. Órt sóndirýshiler ormandy alqapty qorǵap qaldy.
QR Tótenshe jaǵdailar ministrligi azamattardy dala jáne orman alqaptarynda bolǵan kezde qaýipsizdik erejelerin saqtaýǵa shaqyrady. Ormandy dala órtteriniń negizgi sebepteri - turǵyndardyń otqa nemqurai qaraýy. Sondai-aq, ot jaǵýshylar men órttiń shyǵýyna sebepker bolǵandar ákimshilik jaýapkershilikke, al úlken shyǵyn keltirilgen jaǵdaida Qazaqstan Respýblikasynyń Qylmystyq kodeksine sáikes qylmystyq jaýapkershilikke tartylatyndyǵyn eske salady.
