Alla Taǵala Elbasymyzǵa osy bir synaqty eńserýge kúsh-qýat bersin. Mundai tilegin Qazaqstan musylmandary dini basqarmasynyń tóraǵasy Naýryzbai qajy Taǵanuly jetkizdi, dep habarlaidy QazAqparat.
«Ózderińiz kóz jetkizip otyrǵandai, elimizde juqpaly indettiń qaýpi tolyq seiilgen joq. Bul karantin rejiminiń talaptaryna baǵynyp, saqtyq sharalaryna asa mán berýimiz qajet degen sóz. Jasty da, úlkendi de aiamaityn koronavirýs derti Qazaqstan Respýblikasynyń Tuńǵysh Prezidenti - Elbasyn da ainalyp ótpegendigi jaily habar jetti. Alla Taǵala dinimiz ben dástúrimizdiń janashyry Elbasymyzǵa shipa bersin dep tileimiz. Koronavirýs infektsiiasyna bailanysty oqshaýlanyp, emdelip jatqan el qamyndaǵy el aǵalary men barsha azamattarǵa jaratqannyń ózi jar bolǵai! Alla Taǵala Elbasymyzǵa osy bir synaqty eńserýge kúsh-qýat bersin! Jaratqan jappar iemiz jer betinen osy juqpaly indetti joiyp, qalypty ómir tirshiligine oralatyn kúndi jaqyn etkei!» - dedi elimizdiń Bas múftii.
Sonymen qatar, ol qasietti kitabymyz Quranda «rasynda qiyndyqpen birge jeńildik bar, Alla senderge jeńildik qalaidy» delingendigin atap ótedi.
«Barsha jamaǵatty osynaý qiyn sátte bir-birimizdi qoldap, elimizdiń amandyǵyn surap, juqpaly dertten tezirek aiyǵý úshin namazdarymyzdan keiin kóbirek istiǵfar men salaýat aityp, duǵa jasaýǵa shaqyramyn. Jaratqan Alla halqymyzǵa amandyq bersin! Naýqas jandardyń tezirek aiyǵyp ketýin tileimiz. Elimiz aman, jurtymyz tynysh bolǵai! Alla taǵala qasietti otanymyzdy indetten aman saqtap, tezirek jaqsy kúnderde jolyǵýdy barshamyzǵa násip etkei!» - dedi Naýryzbai qajy Taǵanuly.
.jpeg)