Búgin Qazaqstannyń barsha halqy úshin qasterli meiram - Táýelsizdik kúni. Osynaý ultymyz úshin uly kúnge orai QR Parlamenti Senatynyń depýtattary da pikir bildirip jatyr, dep habarlaidy "Ult aqparat".
«Táńir yqylasy túsip Qazaq eline berilgen Táýelsizdik – san ǵasyrlar boiy ata-babamyz ańsaǵan asyl arman edi. Bul jolda bizdiń babalarymyz jaýgershilikke jasymai, tabandylyqpen talmai úzdiksiz kúres júrgizdi. Qazaq ziialylary, ásirese Alash ardaqtylary halyqtyń rýhy men namysyn qajap, egemendigimizdi alý úshin tynbai ter tókti. Tynysh jatqan elge tyrnaǵyn batyra bastaǵan basqynshylarǵa qarsylyq tanytyp, túbegeili táýelsizdikke qol jetkize almasa da avtonomiialyq memleket retinde bólinip shyǵýdy kózdedi. Osy jolda jasaǵan eren eńbekteri men qylǵan qyzmetteri ushan-teńiz. Árbir Alash ideiasyn quptaǵan azamat óz deńgeiinde aianbai at salysty. Alash izbasarlary da qiyndyqtarǵa qaramai, el igiligi úshin erinbei eńbek etti», - dedi QR Parlamenti Senatynyń depýtaty, Qazaqstan jýrnalister Odaǵynyń múshesi Altynbek Nuhuly.
Senator egemen el bolý jolynda talai qiynshylyqty búgingi zamandastary da bastan ótkergenin basa aitady.
«Syndarly sátterde qaiǵydan qairat shyńdap shydamdylyq tanytqannyń arqasynda shirek ǵasyrdan asa ýaqyttan buryn táý eter Táýelsizdigimizge qol jetkizdik. Mine, ata-babanyń ańsaǵan osy kúnin kórip otyrǵan búgingi urpaq - naǵyz baqytty urpaq! Táýelsizdigi moiyndalyp, kók bairaǵy jelbirep, eltańbasy bekip, ánurany qabyldanǵan soń Qazaqstan derbes memleket retinde naqtyly qadamdar jasai bastady. Elbasymyzdyń saiasatynyń jemisiniń bir kórinisi - búgin bizdiń elimiz ózge kórshiles eldermen terezesin teń ustap otyr», - dedi senator.
Ol biylǵy jyly biz álemniń ekinshi ustazy atanǵan Ábý-Nasyr ál-Farabidyń 1150 jyldyǵyn jáne qazaqtyń bas aqyny, danyshpan Abai Qunanbaiulynyń 175 jyldyq mereitoilaryn keń kólemde atap ótkenimizge de nazar aýdartady.
«Sonymen qatar bul jyl – eriktiler jyly dep jariialanǵan bolatyn. Jas urpaq sóilese sózi, atqarsa isi, oilasa armany júzege asatyn Qazaqstan Respýblikasynyń táýelsizdigin asqaqtatyp, qadirlei bilýi kerek. Pandemiia saldarynan álemdik deńgeide keship jatqan aýyrtpashylyqtar men qiynshylyqtardy birge eńserip, jaqynymyzǵa janashyrlyq tanytyp, eldik pen birliktiń belgisin kórsetip kele jatqan halyqqa bas iemiz. El Prezidentiniń 1 qyrkúiektegi «Jańa jaǵdaidaǵy Qazaqstan: is-qimyl kezeńi« atty Joldaýyn iske asyrý - mindetimiz jáne paryzymyz. Bul Táýelsizdigimizdiń nyǵaiý jolyndaǵy jasalatyn jarqyn ister bolmaq. Kók bairaǵymyz máńgilik jelbirer tuǵyrly, Táýelsizdigimiz ǵasyrlarǵa ulǵasar ǵumyrly bolǵai!», - dedi senator.
Al senator Álimjan Qurtaevtyń aitýynsha, Táýelsizdik – bul qazaqqa buiyrǵan eń úlken baqyt. Budan artyq baqyt ta, qundylyq ta, qazyna da joq!
«Alaida, osynaý baqytty, baǵa jetpes qundylyqty árbir qazaq óz júregimen sezinip, joǵary baǵalai alyp júr me? Dúnie júzinde qazaqtan sany kóp, tarihy tereń qanshama halyq bar, biraq olar óz aldyna jeke, táýelsiz el bola almai otyr. Osy turǵydan qarasaq, táýelsizdik qazaqtyń eń úlken baqyty ekenin sezinemiz. Qanshama ǵasyr boiy Táýelsizdik pen Azattyqty ata-babalarymyz ańsady, zaryǵyp kútti, sonyń jolynda qurban boldy. Sonaý qazaqtyń kemeńger úsh biinen, úsh júzdiń basyn qosqan uly han Abylaidan bastap, Alash kósemderi, Jeltoqsan qaharmandaryna deiingi batyrlarymyz eliniń bostandyǵyn armandap ketti. Sol aiaýly armanǵa 1991 jyly 16 jeltoqsanda qol jetkizdik. Qasietti de qasterli ata-baba jolynan taimaǵan Tuńǵysh Prezidentimiz – Elbasy Nursultan Ábishuly Nazarbaevtyń basshylyǵymen tarihi tańdaýymyzdy jasap, táýelsiz Qazaqstan kósh túzedi. Ulttyq birlik pen yntymaqty tý etip ustaǵan Elbasymyzdyń kemeńgerligi men kóshbasshylyǵynyń arqasynda kók bairaǵymyzdy biikke jelbiretip, azat el boldyq», - dedi senator.
Onyń atap ótýinshe, Táýelsizdik degen uly uǵym Jer, El, Halyq, Rýh, Taǵdyr, Kúres, Tulǵa, Alash, Jeltoqsan, Birlik, Yntymaq degen uǵymdarmen bite qainasyp jatyr. Bul uǵymdardy bir-birinen bólek alyp qarai almaimyz.
«Qazaq sonaý aqtaban shubyryndy, alqakól sulamada, Alashtyń zamanynda, 37-niń qyrǵynynda, 86-nyń Jeltoqsanynda myń ólip, myń tirildi. Biraq rýhymyz ólmedi. Qaqaǵan aiazdan, arystandai aqyrǵan azýly imperiianyń aibarynan seskenbegen Jeltoqsan qaharmandarynyń rýhy dúnie júzin dúr silkindirdi. Biz azattyq, bostandyq, erkindik úshin, eń aldymen, Jeltoqsan qaharmandarynyń rýhynyń aldynda qaryzdarmyz! Ulttyq rýhymyzdy kóterip, shyn táýelsiz el bolýymyzǵa serpin bergen bul ult-azattyq kóterilistiń tarihi mánin joǵary baǵalaýymyz kerek. Demek, 16 jeltoqsan – Qaharmandar kúni! Bul kúni barshamyz naǵyz batyrlardyń rýhyna taǵzym etip, óshpes erlikterine basymyzdy iiýge tiispiz. Táýelsizdik tańyn atyrǵan, azattyq asýyna jetkizgen Jeltoqsanshylardy jas urpaqqa úlgi eteiik!
Barshańyzdy ulyq merekemiz – Táýelsizdik kúnimen shyn júrekten quttyqtaimyn! Táýelsizdigimiz baiandy bolsyn desek, árqaisymyz qur sózben emes, naqty ispen qaryshtaǵan Qazaqstannyń búgini men erteńi úshin eńbek eteiik! Táýelsizdigimizdi kózimizdiń qarashyǵyndai saqtaiyq!», - dedi Álimjan Qurtaev.
.jpeg)