Biyldan bastap aliment tóleýden jaltarǵandardyń kólikterin boryshty óndirý úshin alyp qoiýǵa «Sergek» júiesi kómektesetin bolady. Bul týraly QR Ádilet vitse-ministri Almat Madaliev aitty, dep habarlaidy QazAqparat.
«Biyl bul jumystardy jandandyra túsetin eki jait bar. Birinshiden, respýblikalyq palatamen birlese otyryp, sot oryndaýshylardyń aqparattyq júiesin «Sergek» júiesimen yqpaldastyrýdy josparlap otyrmyz. Iaǵni, «Sergek» júiesi ornatylǵan qalalarda kólik quraldaryn tabý ońai bolady. Sonyń nátijesinde aliment boiynsha boryshkerlerden kólikterdi alyp qoiý arta túsedi dep oilaimyz», - dedi vitse-ministr Zoom platformasynda ótken baspasóz máslihaty barysynda.
Sonymen qatar, ol ótken jyly qabyldanǵan zań aiasynda sot oryndaýshylarynyń jaýapkershiligi kúsheitilgenin aitady.
«Bul jaýapkershilik áleýmettik mańyzy bar ister boiynsha arta tústi. Iaǵni, sot oryndaýshylary áleýmettik mańyzy bar isterdi ilgeriletti jáne bizben qoian-qoltyq jumys istep jatyr», - dedi Almat Madaliev.
Buǵan deiin QR Ádilet ministri Marat Beketaev boryshkerden alimentti jyljymaityn múlik nemese kólik esebinen óndirip alý biyl da jalǵasatyndyǵyn aitqanyn habarlaǵan edik.
Jalpy 2020 jyly aliment tóleýden jaltarǵandardan 76 páter men 62 kólik óndirip alynǵan bolatyn.
