Foto: skrinshot
Jelide ózin jazýshy Qýandyq Túmenbaidyń burynǵy kelinimin dep tanystyrǵan kelinshek halyqtan kómek surady, dep habarlaidy Ult.kz.
Onyń aitýynsha, burynǵy kúieýi men ata-enesi ony úsh balasymen úiden qýyp shyqqan.
12 jyl jazýshynyń kelini bolǵan Jaziranyń sózinshe, ol qazir burynǵy kúieýi Erkebulannyń qaryzyn tólei almai otyr. Tipti aliment te almaǵan. Birneshe ret balalaryn alyp, Qýandyq Túmenbaidyń shańyraǵyna da barypty. Biraq jazýshy men áieli politsiia shaqyryp, bosaǵadan qýyp shyqqan. Jazira mán-jaidy Threads jelisine jazyp, jurttan kómek surady.
"Burynǵy kúieýim maǵan aifon aldyryp, mobilograf bolamyn dedi. Artynan túk bolmaǵandai toqal alyp, qydyryp júr. Qyzben SMM kýrs oqyp júrip tanysypty. Endi eki ai boldy, ne nesieni tólemeidi, ne aliment tólemeidi. Ne úlken adam siiaqty bailanysqa shyqpaidy. Úsh balam ne jep, ne iship jatyr dep oilap otyrǵan joq. Ákesi jazýshy, anasynyń atynda qanshama páterleri bar. Tóleimin dese bir kúnde bárin jaýyp tastaýǵa jaǵdailary jetedi. Tolyq jaýyp berse múldem bailanysqym kelmeidi. Qazir biraq basqa amalym joq", – dep jazdy Jazira.
Jazira qazir dekrettik demalysta. Qosymsha tabysy bolǵanymen, tapqany balalardyń tamaǵynan artylmaidy. Ol burynǵy kúieýiniń jaǵdaiy joq bolsa túsinýge bolatynyn, alaida onyń basqa áiel alǵannan keiin balalaryn umytyp ketkenine qynjylatynyn aitty.
"Bólip tóleimin degen erkek sózinen taiyp, birde-bir ret bailanysqa shyqpady, qashyp júr. Balalarymmen úiine bardym, áke-sheshesimen jabylyp qýyp shyqty. Videoǵa túsirip turǵan balalarym. Nemerelerinen aiaq tartar dep birinshi ret alyp barǵan edim, biraq ol da kómek bermedi", – deidi ol.
