Foto: gov.kz
Túrkistan oblysynda aliment tóleýden jaltaryp júrgen boryshkerlerge qatysty birqatar óreskel zań buzýshylyqtar anyqtaldy. Oblys prokýratýrasynyń málimetinshe, aliment boiynsha qaryzy bar azamattar óz mindetin oryndaýdyń ornyna býkmekerlik keńselerge qarjy salǵan, dep habarlaidy Ult.kz.
Prokýratýra júrgizgen taldaý nátijesinde aliment qaryzy 166 mln teńgeden asatyn 21 boryshkerdiń qumar oiyndarǵa 15 mln teńgeden astam qarajat jumsaǵany belgili boldy. Qazirgi tańda atalǵan tulǵalardy qylmystyq jaýapkershilikke tartý baǵytynda tiisti is-sharalar qolǵa alynǵan.
Sonymen qatar, ótken jyly óńirde aliment tólemegen 19 boryshkerge Qylmystyq kodekstiń 139-baby boiynsha qylmystyq is qozǵalǵan.
Tekserý barysynda sot oryndaýshylary tarapynan da birqatar olqylyq anyqtalǵan. Atap aitqanda, jalpy qaryzy 1,5 mlrd teńgeni quraityn 1 167 boryshkerge el aýmaǵynan shyǵýǵa shekteý qoiylmaǵan. Al 18 mln teńge qaryzy bar 21 adamnyń elden shyǵýyna qatysty derekter tirkelgen. Budan bólek, 170 mln teńge bereshegi bar 120 boryshkerdiń múlkine tyiym salynbaǵan, al 2 635 azamattyń kólik basqarý quqyǵy ýaqytsha toqtatylmaǵany anyqtaldy.
Osy olqylyqtardyń aldyn alý maqsatynda oblys prokýratýrasynyń bastamasymen boryshkerler men olardyń otbasylaryna áleýmettik-quqyqtyq qoldaý kórsetý tetigi iske qosyldy. Sot oryndaýshylary «FSM Social» elektrondyq platformasyna qosylyp, boryshkerlerdi jumysqa ornalastyrý, áleýmettik jáne rýhani kómek kórsetý jumystary tsifrlyq formatta júzege asyrylmaq.
