QR Premer-Ministri Álihan Smaiylov iri biznes ókilderin taýar tasymalynyń logistikasyn qaita qaraý týraly aitty, dep habarlaidy QazAqparat.
«Iri kásipkerliktiń Qazaqstan ekonomikasyndaǵy úlesi – 48%. Sondyqtan bul segmenttiń jaýapkershiligi de zor. Úkimet biznestiń, onyń ishinde iri biznestiń de damýyna qolaily jaǵdai jasaý úshin tiisti sharalardy qabyldaidy.
Jahandy jailaǵan daǵdarystan keiingi bizdiń aldymyzda turǵan eń mańyzdy máseleniń biri – makroekonomikalyq turaqtylyqty qamtamasyz etý. Úkimet pen Ulttyq Banktiń birlesken saiasaty osy maqsatqa baǵyttalady», - dedi ol Prezidenttiń iri biznes ókilderimen kezdesýinde.
Onyń aitýyna qaraǵanda, qazir Úkimettiń aldynda turǵan eń aýyr mindettiń biri – infliatsiia deńgeiin tómendetý.
«Birinshi kezekte, aýyl-sharýashylyq ónimderin óndirý, ishki naryqty azyq-túlikpen tolyqtyrý jáne azyq-túlik qaýipsizdigin qamtamasyz etý jolǵa qoiylyp jatyr.
Mezgilaralyq kezeńde infliatsiia qysymy men syrtqy faktorlardyń áserin tómendetý úshin tiisti logistika júiesin qurý óte mańyzdy. Iri kásipkerlerdi osy jumysqa qatysýǵa shaqyramyz.
Úkimet iri biznes ókilderimen ózara birlesip jumys isteýge qashan da daiyn ekenin aitqym keledi», - dedi Premer-Ministr.
