QR Premer-Ministri Álihan Smaiylov Qazaqstan-Túrkiia biznes-forýmynda birlesip jumys isteýge tiimdi bolatyn birqatar salany atady, dep habarlaidy QazAqparat.
«Úkimet eldiń investitsiialyq tartymdylyǵyn jaqsartý boiynsha belsendi jumys júrgizýde. Biz ózimizdiń investitsiialyq saiasatymyzǵa aitarlyqtai ózgerister engizdik. Jahandyq energetikalyq jáne tehnologiialyq talaptardy kúsheitý jaǵdaiynda jańa investitsiialyq saiasat tujyrymdasy jobasyn ázirledik. Jańa ózgerister ekonomikanyń basym salalarynda investorlar úshin salyqtyq júieni ońtailandyrý jáne jeńildetý, sýbsidiiadar jáne basqa da is-sharalardy qamtidy. Jańa tásilderge sáikes, biz memlekettik retteýdi azaitý jáne jekeshelendirýdi jyldamdatý boiynsha tiisti qadamdar qabyldap jatyrmyz. Bul óz kezeginde eńbek ónimdiligin arttyryp, jeke sektordyń jumys isteýine jol ashady», - dedi Á. Smaiylov «Rixos President Astana» qonaq úiinde Qazaqstan-Túrkiia biznes-forýmynda.
Úkimet basshynyń aitýynsha, investorlarǵa memlekettik qoldaýdyń túrli sharalary, salyqtyq jeńildikter, kedendik bajdardan bosatý, zattai granttar berý túrindegi preferentsiialar usynylady. Osy sátti paidalana otyryp, Á. Smaiylov túrik seriktesterdiń nazaryna birneshe baǵytty usyndy.
«Birinshi, metallýrgiia jáne taý-ken óndirý salasy bizdiń ekonomikamyzdyń basty sektory bolyp sanalady. Onda ónerkásip pen ulttyq eksporttyń shamamen 20 protsenti shoǵyrlanǵan. Tabiǵi resýrstar qory boiynsha Qazaqstan álemde altynshy orynda, mineraldy shikizatty óndirýdiń jalpy kólemi boiynsha 10-shy orynda. Qazir igerilmei jatqan ken oryndaryna tekserý júrgizilýde. Bosaityn ken oryndary jańa investorǵa berý úshin aýktsionǵa shyǵarylady. Bul salanyń damýyna jańadan qabyldanǵan «Jer qoinaýy týraly jáne jer qoinaýyn paidalaný týraly» kodeks qosymsha yqpal etedi. Ol bizdiń jer qoinaýymyzdyń qoryn odan ári zertteý úishn birqatar jeńildikter berýdi qarastyrylady. Jańa kodeks qabyldanǵan sátten bastap, úsh jylda jer qoinaýyn paidalanýǵa bergen litsenziialar sany 1600-den astyp, suranystyń airyqsha artqanyn kórsetti. Túrik biznesin osy baǵytta birlesip, belsendi jumys isteýge shaqyramyn», - dedi Álihan Smaiylov.
Ekinshiden, Premer-Ministr mashina jasaý salasy – Qazaqstannyń ekonomikalyq ósý draiverleriniń biri ekenin jetkizdi.
«Bul salaǵa iri sheteldik kompniialar da belsendi atsalysýda. Mashina jasaý ónimderiniń eksporty ósip, import kólemi birtindep azaiýda. Atalǵan sektordyń damýy úshin túrik kompaniialaryn osy salada jobalardy júzege asyrýǵa shaqyramyz. Óitkeni bul salada jaqsy shikizat bazasy bar, sondai-aq eksporttyq áleýeti de óte joǵary. Úshinshi, agroónerkásip kesheni – Qazaqstan úshin strategiialyq baǵyttardyń biri ári túrik kompaniialary úshin zor áleýetke ie. Qazaqstandaǵy aýyl sharýashylyǵy alqaptary 200 mln gektardan asady, al jaiylymdar – 180 mln gektarǵa jýyq. BUU Azyq-túlik jáne aýylsharýashylyq uiymy Qazaqstandy álemdegi eń perspektivaly aýyl sharýashylyǵy ónimderin óndiretin bes eldiń biri retinde ári jahandyq ári aimaqtyq azyq-túlik qaýipsizdigin qamtamasyz etýdegi mańyzdy oiynshy retinde tanydy. Agrarlyq saladaǵy ózara tiimdi yntymaqtastyqtyń áleýeti shynymen úlken», - dedi Á. Smaiylov.
Tórtinshiden, Qazaqstan 2030 jylǵa qarai jańartylatyn energiia kózderi úlesin 15 protsentke deiin ulǵaitýǵa jáne 2060 jylǵa qarai kómirtekti beitaraptyqqa jetýge nietti. Qazaqstan energetika salasyndaǵy jobalardy júzege asyrý úshin joǵary dárejedegi tájiribeli túrik kompaniialarynyń qatysýyna múddeli. Úkimet óz tarapynan jańarytlatyn energiia salasyndaǵy jobalardy sátti jasaý úshin qajetti birqatar qoldaý sharalaryn usynýǵa daiyn.
«Besinshi, Astana halyqaralyq qarjy ortalyǵy qarjy sektoryndaǵy yntymaqtastyqtyń ózara tiimdi perspektivalaryn usynady. Oǵan qatysýshylarǵa 50 jylǵa deiin salyq jeńildikteri, jeńildetilgen valiýtalyq, vizalyq jáne eńbek rejimderi qarastyrylǵan. Aǵylshyn quqyqyǵyna negizdelgen táýelsiz sot jáne halyqaralyq tórelik ortalyǵy ádildikke jáne investorlardyń quqyqtaryn qorǵaýǵa kepildik beredi. Qazirgi ýaqytta ortalyqta 17 túrik kompaniiasy tirkelgen, qatysýlaryńyzdy odan ári keńeitýge shaqyramyz», - dedi Álihan Smaiylov.
Aita keteiik, elordada Túrkiia Respýblikasynyń Vitse-Prezidenti Fýat Oktai myrzanyń Qazaqstan Respýblikasyna sapary sheńberinde Qazaqstan-Túrkiia biznes-forýmy ótip jatyr.
