Premer-Ministr Álihan Smaiylovtyń tóraǵalyǵymen Investitsiialyq shtab otyrysy ótti, dep habarlaidy "Ult aqparat" Úkimettiń resmi saityna silteme jasap.
Otyrysta investitsiialar tartý boiynsha 2021 jyly nysanaly indikatorlardyń oryndalý qorytyndysy jáne 2022 jylǵa arnalǵan josparlar qaraldy.
2021 jyly negizgi kapitalǵa salynǵan investitsiialar kólemi 13,2 trln teńgeni qurady, bul 2020 jylǵy kórsetkishten 7,3%-ǵa artyq. Investitsiialar ósiminiń negizgi lokomotivteri ekonomikanyń shikizattyq emes sektorlary boldy. Máselen, investitsiialardyń naqty kólem indeksteri óńdeý ónerkásibinde 1,4 ese, qurylysta 1,2 ese, aýyl sharýashylyǵynda 1,3 ese ósti.
Óńdeý ónerkásibinde ósiminiń neǵurlym joǵary kórsetkishterine metallýrgiiada (+27%), toqyma óndirisinde (+28%), farmatsevtikada (+39%), himiia ónerkásibinde (+55%), mineraldyq ónimderde (+100%) qol jetkizildi.
Respýblika boiynsha negizgi kapitalǵa investitsiialar tartý boiynsha jyldyq jospar 94%-ǵa oryndaldy. Nysanaly kórsetkishter Shymkent qalasynda (115,5%), Aqtóbe (101,8%) jáne Qostanai (101,3%) oblystarynda asyra oryndaldy. Qaraǵandy oblysynda (99,9%), Almaty qalasynda (99,8%), Atyraý (99,1%), Jambyl (97,4%), Pavlodar (96,2%) oblystarynda, Nur-Sultan qalasynda (96,1%) sál artta qalýshylyq bar. Shyǵys Qazaqstan (92,1%) jáne Mańǵystaý (90,8%), Almaty (89,7%), Aqmola (89,4%), Túrkistan (82,5%), Soltústik Qazaqstan (80,4%) oblystarynda jospar oryndalmaǵan.
Eń tómengi kórsetkishter Batys Qazaqstan (69,6%) jáne Qyzylorda (66,4%) oblystarynda tirkeldi. Premer-Ministrdiń tapsyrmasy boiynsha atalǵan eki óńir ákimderiniń orynbasarlary tártiptik jaýapkershilikke tartylatyn bolady.
2021 jyldyń 9 aiynyń qorytyndysy boiynsha QR ekonomikasyna tikelei sheteldik investitsiialar kólemi 49%-ǵa artyp, $18,7 mlrd qurady. Qazaqstan ekonomikasyna is júzinde barlyq negizgi investor elder boiynsha kapital aǵynynyń ósýi baiqalady. Top-10 investor memlekettiń qataryna Niderlandy, AQSh, Shveitsariia, QHR, Resei, Ulybritaniia, Belgiia, Túrkiia, Ońtústik Koreia jáne Frantsiia kirdi.
«Kósh sońynda qalǵan óńirler belgilengen KPI qatań saqtaý qajettigine nazar aýdarýy tiis. Nysanaly indikatorlarǵa qol jetkizbegeni úshin ákimderge derbes jaýapkershilik júkteledi. Memlekettik organdar men ákimdikter ishki jáne syrtqy investitsiialardy tartý boiynsha jumysty júieli túrde jalǵastyrsyn», — dedi Á. Smaiylov.
