Tuqym satyp alý, qaita óńdeýge tapsyrylatyn daqyldar óndirý, sý berý boiynsha kórsetiletin qyzmet qunyn sýbsidiialaý byltyrǵy shamada saqtalady, dep habarlaidy QazAqparat.
Úkimet otyrysynda QR Premer-Ministri Álihan Smaiylov osylai dedi.
«Ózderińizge málim, qazir búkil álemde aýyl sharýashylyǵy ónimderine degen suranys kún sanap artyp keledi. Suranysqa sai onyń baǵasy da qymbattap barady.Sondyqtan ishki naryqty otandyq ónimmen qamtamasyz etip ǵana qoimai, onyń eksporttyq áleýetin de arttyrý – asa mańyzdy másele.
Osy turǵyda kóktemgi egis jumystaryn ýaqytyly ári sapaly júrgizý kerek. Bul – elimizdiń azyq-túlik qaýipsizdigin qamtamasyz etý úshin ózekti másele. Óz kezeginde Úkimet naýqandyq jumystardy qarjylyq jáne materialdyq-tehnikalyq jaǵynan qamtamasyz etý úshin qajetti barlyq sheshimderdi qabyldady. Biyl osy jumystarǵa 70 mlrd teńge biýdjettik kredit bólindi. Sondai-aq Azyq-túlik kelisimshart korporatsiiasy forvardtyq satyp alýǵa arnalǵan qarajatty 80 mlrd teńgege deiin ulǵaitty», - degen Úkimet basshysy respýblikalyq biýdjetten naýqandyq jumystarǵa taǵy 70 mlrd teńge bólinetinin atady.
Iaǵni memleket biyl egistik jáne ony jinaý jumystaryna barlyǵy 220 mlrd teńgeden astam qarjy bólip otyr. Bul ótken jylǵa qaraǵanda 2 ese kóp.
«Sonymen qatar tyńaitqyshtar men pestitsidterdi satyp alý qunynyń 50%-in sýbsidiialaý ári qarai jalǵasady.
Tuqym satyp alý, qaita óńdeýge tapsyrylatyn daqyldar óndirý, sý berý boiynsha kórsetiletin qyzmet qunyn sýbsidiialaý da byltyrǵy shamada saqtalatyn bolady», - dedi Premer-Ministr.
