«QazMunaiGaz» UK AQ Basqarma tóraǵasy Alik Aidarbaev kompaniia barlyq qiyndyqty eńseretinin málim etti, dep habarlaidy QazAqparat.
«QazMunaiGaz» basshysy OPEK+ elderi munai óndirisin azaitý týraly kelisimge kelip, Qazaqstan bul sheshimge qoldaý bildirgenin jetkizdi.
«Sol sebepti munai óndirisiniń azaiyp, munai ónimderine suranys azaiyp bara jatqandyqtan jyldyń sońynda bizdiń óndiristik ári qarjylyq kórsetkishter joǵary bolmaitynyn boljap otyrmyz. Alaida biz jaǵdai sonshalyqty ýshyqty dei almaimyz. «QazMunaiGazda» qiyndyqqa shydas beretin qory bar. Biz ony enshiles kompaniialardy ishinara qoldaý úshin paidalanatyn bolamyz», - dedi Alik Aidarbaev Elbasy Nursultan Nazarbaevtyń tóraǵalyǵymen ótken «Samuryq-Qazyna» keńesiniń otyrysynda.
«QazMunaiGaz» basshysynyń aitýynsha jahandyq daǵdarys qazir dúnie júziniń barlyq memleketine aýyr saldaryn tigizgen.
«Siz (Nursultan Nazarbaevqa) jaqynda jumys tártibin qaita qalyptastyryp, jańa ádis-tásilderdi qoldaný qajet dep atap ótken edińiz. Biz osy jumysty qolǵa aldyq. Daǵdarysty eńserý úshin bizdiń múmkindigimiz jetkilikti. Úkimet «Samuryq-qazyna» qorymen kúsh biriktire otyryp, «QazMunaiGaz» barlyq qiyndyqty eńserip, el igiligi úshin jumysty jalǵastyratynyna senimdimin», - dedi ol.
Óz kezeginde Elbasy Nursultan Nazarbaev «QazMunaiGaz» - «Samuryq-Qazyna» qorynyń quramyndaǵy eń úlken kompaniia ekenin atap ótti.
«Sondyqtan myna ýaqytta árine ońai bolmaidy. Dúnie júzindegi barlyq kompaniiamen birge kóretin qiyndyq. Birge eńserý kerek. Osy jumystyń bárin ary qarai jalǵastyra berińiz», - dedi Elbasy.
