Maqsatty aǵymdaǵy transfertterdiń negizgi kólemi áleýmettik salaǵa tiesili. Bul týraly Senattaǵy Úkimet saǵatynda QR Ulttyq ekonomika ministri Álibek Qýantyrov aitty, dep habarlaidy QazAqparat.
«Biýdjetaralyq qatynastardyń qoldanystaǵy júiesi aldyńǵy qatarly halyqaralyq tájiribege sai keledi dep atap ótken jón. Damyǵan elderde transfertter óńirlerge biýdjettik shyǵystar men kirister múmkindigi arasyndaǵy aiyrmashylyqty jabýǵa bólinip, arnaýly sipatqa ie emes. Álemdik tájiribedegi kópshilik maquldaǵan osyndai qadam aǵymdaǵy shyǵystardy jergilikti biýdjetterge obektivti bólýge qamtamasyz etedi. Sáikesinshe, biýdjet qarajaty esebinen usynylatyn kepildik etilgen memlekettik qyzmetterge barsha óńirdiń halqyna teń qoljetimdik eskerilgen. Biýdjetaralyq qatynastardy jetildirý boiynsha jumys turaqty negizde júrgiziledi. Nátijesinde, jergilikti biýdjetter parametrlerinde ońtaily ózgeristi baiqap otyrmyz», - dedi Á. Qýantyrov biýdjetaralyq qatynastardy jetildirý taqyrybyndaǵy Úkimet saǵatynda.
Onyń aitýynsha, sońǵy úsh jylda jergilikti atqarýshy organdardyń boljamǵa qaraǵanda jeke kirister boiynsha asyra oryndaý kólemi 117 paiyzdy qurap, olardyń damý biýdjeti 106 paiyzǵa ósti. Ortalyqqa táýeldilik 2019 jyldaǵy 59 paiyzdan 2021 jyly 56 paiyzǵa deiin qysqardy.
«Sonymen qatar, jekelegen óńirlerdiń maqsatty transfertterge táýeldiliginiń saqtalýy únemi synǵa ushyrap jatady. Biýdjettik protsesti jetildirý úshin bizde tiisti rezervter bar», - dedi ministr.
Onyń sózine qaraǵanda, maqsatty aǵymdaǵy transfertterdiń negizgi kólemi áleýmettik salaǵa tiesili. Bular áleýmettik sala jumyskerleriniń, ishki ister organdary men basqa da salalar qyzmetkerleriniń eńbegin tóleýdi arttyrýǵa bailanysty shyǵystardyń shamamen 70 paiyzy.
«Bul shyǵystar qoldanystaǵy úsh jyldyq transfertterdiń kezeńinde paida boldy jáne olar 2023-2025 jyldarǵa jalpy sipattaǵy transfertterdi esepteý kezinde jergilikti biýdjetter bazasyna beriledi. Atap ótsek, jeke óńirlerdiń táýeldiligi óńirlik mártebeniń ózgerýimen túsindiriledi», - dedi vedomstvo basshysy.
