Búgin Úkimet otyrysynda QR Ulttyq ekonomika ministri Álibek Qýantyrov Aqtóbe oblysyn damytýdyń 2022-2025 jyldarǵa arnalǵan jańa keshendi jospary aiasynda atqarylatyn jumystardy atady, dep habarlaidy QazAqparat.
«Aqtóbe oblysynyń keshendi jospary 92 is-sharadan turady. Jospardy iske asyrýdyń jalpy somasy 1,7 trln teńge, onyń ishinde respýblikalyq biýdjet – 343,3 mlrd teńge, jergilikti biýdjet - 165,6 mlrd teńge, jeke investitsiialar - 1,2 trln teńge. Keshendi jospar aiasynda jańartylatyn energiia kózderin damytý, tsement óndirý zaýytyn, titan-tsirkonii kenderin qaita óńdeý jónindegi taý-ken baiytý keshenin salý jáne taǵy basqa iri jobalardy iske asyrý kózdelýde. Sonymen qatar, sheteldik investorlardy tarta otyryp, erekshe indýstriialyq aimaq qurylatyn bolady. Kóptegen kásiporyndar eksportqa baǵdarlanǵan bolady dep kútilýde», - dedi Á. Qýantyrov.
Onyń aitýynsha, «Buhara-Oral» magistraldyq gaz qubyrynyń úshinshi jelisin salý jáne 85 aýyldy gazdandyrý, sondai-aq Aqtóbe qalasyndaǵy káriz-tazartý qurylystaryn jańǵyrtý ári turǵyn úi qurylysy aýdandarynda injenerlik-kommýnikatsiialyq jeliler salý josparlanýda.
Budan basqa, 1300 shaqyrymnan astam avtomobil joly jańǵyrtylady. Bul óz kezeginde Aqtóbe qalasynyń «ósý ortalyǵy» jáne elimizdiń batys bóligindegi iri kólik toraby retindegi rólin kúsheitýge yqpal etetin bolady.
«Densaýlyq saqtaý jáne bilim berý júieleri qyzmetteriniń qoljetimdiligi men sapasyn arttyrý úshin qazirgi zamanǵy infraqurylym qurylatyn bolady. 18 aýylda densaýlyq saqtaý nysany salynady. 224 mektep jańǵyrtylyp, ońaltý ortalyǵy salynady. Sonymen qatar, Aqtóbe qalasynda kolledj stýdentteri úshin eki jataqhana salý josparlanýda», - dedi ministr.
Onyń sózine qaraǵanda, keshendi jospardy iske asyrý 2025 jylǵa qarai negizgi kapitalǵa salynatyn investitsiialar ósimi 2,5 eseni nemese 1,5 trln teńgeni quraidy, ónerkásip kólemi 1,6 esege nemese 1,8 trln teńgeden 2,8 trln teńgege deiin artady, aýyl sharýashylyǵynyń jalpy ónim kólemi 37%-ǵa ósýin qamtamasyz etedi.
Sonymen qatar, 4,3 mln sharshy metr turǵyn úi paidalanýǵa beriledi, sýmen jabdyqtaý qyzmetterine qoljetimdilik 100%-dy quraidy.
