Búgin Atyraýdaǵy tragediiaǵa qatysty sot otyrysy jalǵasyp jatyr, dep habarlaidy ult.kz.
Jýrnalist Janat Moldashova sot zalynan video jariialady.
Sultan Sársemáliev 2025 jyldyń qarasha aiynda jalǵyz ózi Mekkege baryp kelgen.
«Ólsem de Qudaidan keshirim surap óleiinshi dedim. Basym aýǵan jaqqa kettim. Túrkiia arqyly Mekkege bardym», - dedi ol.
Atyraý oblysynda bir otbasynyń tórt múshesin óltirdi dep aiyptalǵan Sultan Sársemálievke qatysty sot protsesi jalǵasýda. Aiyptalýshyǵa Qylmystyq kodekstiń 13 baby boiynsha aiyp taǵylǵan. Olardyń qatarynda birneshe adamdy qasaqana óltirý, urlyq, alaiaqtyq jáne qujattardy zańsyz iemdený baptary bar.
Sot barysynda Sársemáliev aiyptardyń bir bóligin moiyndaǵanymen, Naýryz Muqanǵalievtiń ólimine qatysty taǵylǵan «qasaqana kisi óltirý» aiybymen kelispeitinin aityp, oqiǵanyń ózin qorǵaý kezinde bolǵanyn málimdedi. Al qalǵan úsh jábirlenýshige pyshaq jaraqatyn salǵanyn rastady.
Tergeý málimetinshe, qylmystar 2025 jyly jasalǵan. Keiin Sultan Sársemáliev burynǵy jubaiymen birge Indoneziia aýmaǵynda ustalyp, Qazaqstanǵa ekstraditsiialanǵan. Qazirgi ýaqytta is Atyraý oblysynyń qylmystyq ister jónindegi mamandandyrylǵan aýdanaralyq sotynda qaralyp jatyr. Sottyń túpkilikti sheshimi áli shyqqan joq.
