Nur-Sultan qalasynda dástúrli «Astana Finance Days» konferentsiiasy aiasynda alǵash ret «EdTech» bilim berý tehnologiialary forýmy ótti.
Sharaǵa Coursera, EdCrunch, Google, Microsoft, ACCA, GARP syndy halyqaralyq kompaniialardyń ókilderi qatysyp, bilim berý tehnologiialaryndaǵy ózekti máselelerdi talqylady.
Forým halyqaralyq kásibi sertifikattaý, innovatsiialar, tehnologiialar, tsifrlandyrý, inkliýzivti tásilder, STEM jáne basqa da ozyq jetistikter arqyly adam kapitalynyń sapasyn arttyrýǵa serpin berý maqsatynda túrli indýstriia ókilderin jinady.
«EdTech» forýmy – múddeli tulǵalardyń kásibi damýyn innovatsiialar qurýda ortaq maqsatqa biriktirip, bilim berý tehnologiialary salasyndaǵy bastamalardy damytýǵa arnalǵan integratsiialyq alań.
«Biz kompaniialardy jinaqtai bastaǵan kezde balabaqshadan bastap eresek býynǵa deiin túrli segmentterde jumys isteitin kóptegen kompaniiany kezdestirdik. Sosyn biz biýroda kimniń nemen ainalysatyny jáne qandai qyzmetter usynatyny týraly naqty aqparat bolý úshin qazaqstandyq kompaniialardyń kartasyn ázirledik. Olardyń bári birlese jumys istep, elimizdi jaqsy jaqqa ózgertýge kómektesedi dep oilaimyz», - deidi «AIFC Administration» AQ basqarma tóraǵasynyń orynbasary Ernur Rysmaǵambetov.
Onyń aitýynsha, Qazaqstanda tiimdi EdTech ekojúiesin qurý úshin ishki naryqtaǵy jobalar jetkiliksiz. Sondyqtan Astana halyqaralyq qarjy ortalyǵy qazirdiń ózinde iri biznes pen kompaniialar arasynda dialog ornatý úshin kúsh alyp otyr. Bul Qazaqstandaǵy kompaniialardyń sanyn arttyryp qana qoimai, «EdTech» kólemindegi laiyqty deńgeige kóteredi.
«Forým formatyn keńeitý jóninde usynystar kelip tústi. Mysaly, kelesi jyly biznes-qaýymdastyqpen investitsiialyq jáne seriktestikke baǵyttalatyn Orta aziialyq EdTech forýmyn ótkizýge usynys aldyq. Biz bizneste edtech-jobalar korporatsiialar men qarapaiym adamdardyń ómirin ózgerte alatyn birqatar tabysty isterdi kórsetýge tyrysamyz», - dep óz josparlaryn bólisti Ernur Rysmaǵambetov.
Aita keteiik, kórmede jaqsy jetistikterimen kózge túsken komandalar Máskeýdegi «EdCrunch» konferentsiiasyna joldama alady jáne de Astana Hub-tyń akseleratsiia baǵdarlamasyna qatysý sertifikaty beriledi.
