Kitap oqý men ony damytýdyń ulttyq baǵdarlamasy kerek. Bul týraly Parlament Senatynyń jalpy otyrysynda depýtat Nurtóre Júsip málim etti, dep habarlaidy "Ult aqparat".
«Qazir jurt kitap oqýdan qalyp bara jatyr. Kitap oqymaǵan adam qalai bilimdi bolady? Kitap oqymaityn qoǵam qalai rýhani kemeldenbek? Kezinde danyshpandar adamnyń rýhani kemeldenýine kitap oqýdyń qandai paidasy bar ekenin aityp ketken. Qazir tek Qazaqstanda ǵana emes, búkil álemde osy kitap oqý úrdisi daǵdarysqa tap boldy», - dep toqtaldy senator Úkimet basshysy Asqar Maminniń atyna joldaǵan depýtattyq saýalynda.
Osy oraida N. Júsip ulttyń ziiatkerlik áleýetin arttyrý, básekelestik qabiletin kúsheitý, áleýmettik jáne shyǵarmashylyq belsendiligin arttyrý isinde kitap oqý óte mańyzdy ekenin atap ótti.
«Internet, Facebook, Instragram, telearna, radio arqyly alynǵan aqparattar tolyqqandy bilim negizin qurai almaidy. Sol sebepten de álemniń kóptegen elinde kitap oqý isine memlekettik ári qoǵamdyq qoldaý kórsetilip jatyr. Osy baǵytta ulttyq baǵdarlamalar qabyldanyp, otbasylyq jáne balalar oqýyna airyqsha kóńil bólinip otyr. Mundai baǵdarlama bizde nege joq? Osyǵan orai Qazaqstanda ákimshilik qurylymdar men kitaphana qyzmetine, mádeni-aǵartý mekemeleri men qoǵamdyq uiymdarǵa baǵyttalǵan ulttyq baǵdarlama qabyldaý kerek dep esepteimiz», - dedi Nurtóre Júsip.
Onda áleýmettik mańyzy bar kitaptardy sapalyq turǵyda jaqsartý, kitap saýdasynyń progressivti formalaryn engizý, kitap oqýǵa yntalandyrý úshin grant konkýrstyq júie engizý, bilim berý qurylymdarynyń áleýmettik áriptestigin damytý, azamattardyń ǵylymi-áleýmettik, tehnikalyq, shyǵarmashylyq qabiletterin damytý, kitaphanalar qoryn qaǵaz jáne elektrondy basylymdarmen tolyqtyrý, túrli ádebi konkýrstar men baiqaýlar ótkizý, sondai-aq kitap basý men kitap saýdasy mamandaryn daiarlaý, ulttyń ziiatkerlik jáne adami áleýetin arttyrý sharalaryn qarastyrý usynyldy.
