Foto: ashyq derekkóz
Qarjylyq monitoring agenttigi Bas prokýratýranyń úilestirýimen jáne Sot ákimshiliginiń ishki qaýipsizdik bólimshelerimen birlesip, áleýmettik osal toptarǵa arnalǵan turǵyn úilerdi zańsyz iemdený deregi boiynsha tergeý bastady, dep habarlaidy Ult.kz.
Bul sanatqa kópbalaly otbasylar, jetim balalar jáne múgedektigi bar azamattarǵa arnalǵan páterler kiredi.
Vedomstvo málimetinshe, 2014–2016 jyldary «Tólendi» turǵyn úi-qurylys kooperativin basqarǵan A. Baijumanov paishylardyń qarajatyn jymqyrýdyń iri shemasyn uiymdastyrǵany úshin 8 jylǵa bas bostandyǵynan aiyrylǵan. Keiin atalǵan kooperativke qatysty keibir páterlerdiń qurylysy Astana qalasy ákimdigi tarapynan áleýmettik osal sanattaǵy azamattarǵa arnalyp aiaqtalǵan.
Alaida bas bostandyǵynan aiyrý oryndarynan bosap shyqqannan keiin Baijumanov jańa zańsyz shema oilastyrǵan. Tergeý dereginshe, ol «ótken kúnmen rásimdelgen» jalǵan qujattardy paidalana otyryp, páterlerdi zańsyz iemdenýdi kózdegen.
Nátijesinde 80-nen astam adam «jalǵan úlesker» retinde jábirlenýshi dep tanylyp, ýákiletti uiymnan 170 jyljymaityn múlik nysanyna zańsyz quqyq alǵan. Kúdiktiler bul páterlerdi óteýsiz iemdenip, keiin úshinshi tulǵalarǵa satýdy josparlaǵan.
Osylaisha jalpy quny 2,3 milliard teńgeden asatyn jyljymaityn múlikti zańsyz iemdený áreketiniń joly kesildi. Qazirgi tańda kúdiktilerge qatysty qamaýda ustaý túrindegi bultartpaý sharasy qoldanylǵan. Tergeý amaldary jalǵasyp jatyr.
