Foto: pixabay.com
Aýyl sharýashylyǵy vitse-ministri Azat Sultanov áleýmettik nannyń qymbattaýyna eshqandai alǵyshart joq ekenin málimdedi, dep habarlaidy Sputnik Qazaqstan.
Aitýynsha, memleket áleýmettik mańyzy bar azyq-túlik ónimderiniń baǵasyn retteidi. Oǵan birinshi surypty un jáne osy unnan jasalatyn áleýmettik nan kiredi.
"Áleýmettik nannyń baǵasy turaqty. Esterińizde bolsa, byltyr bidai baǵasy 85-90 myń teńge, onyń aldyńǵy jyly 180 myń teńgege deiin jetken bolatyn. Biraq soǵan qaramastan áleýmettik nannyń baǵasy turaqty boldy. Biz arnaiy sýbsidiialaý baǵdarlamasy boiynsha áleýmettik nannyń baǵasyn retteimiz. Sol sebepti el halqyna alańdaýdyń qajeti joq. Jinalǵan astyq ishki naryqty qamtamasyz etýge jetedi", - dep sendirdi Sultanov Astanada ashylǵan halyqaralyq KazAgro/KazFarm-2023 aýyl sharýashylyǵy kórmesiniń kýlýarynda.
Ministrlik áleýmettik nan óndirisine qajetti arzan undy óńirlerge jóneltedi.
"Iaǵni áleýmettik nannyń baǵasy turaqty. Onyń qymbattaýyna alǵyshart joq", - dedi ol.
Al premialdy nannyń, mysaly toqash, krýassan sekildi ónimderdiń baǵasyn naryq retteidi.
"Onyń baǵasyn memleket rettemeidi. Óitkeni ol áleýmettik mańyzy bar azyq-túlikke jatpaidy. Bul jerde ony naryq retteidi", - dep túsindirdi Sultanov.
