2020 jyly áleýmettik-eńbek salasynda kórsetiletin barlyq qyzmetter elektrondyq formatqa kóshiriledi. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda Birjan Nurymbetov Eńbek jáne halyqty áleýmettik qorǵaý ministrligi tsifrlandyrý deńgeii boiynsha jetekshi memlekettik organdardyń biri bolyp tabylatynyn atap ótti. Tek 2019 jyldyń ózinde ǵana áleýmettik-eńbek salasyndaǵy kórsetiletin qyzmetterdi elektrondyq formatqa aýystyrý 2,2 mlrd teńgeni únemdeýge múmkindik berdi.
Máselen, jumyspen qamtý jáne jumysqa ornalastyrý salasynda «Elektrondyq eńbek birjasy» jáne «Elektrondyq eńbek sharttary» jobalary iske asyrylýda. Búgingi tańda «Elektrondyq eńbek birjasy» 214 myń jumys berýshini, milliondai jumys izdeýshini, Coursera onlain bilim berý platformasy arqyly 1,5 myń saǵatqa jýyq tegin sabaqty qamtidy.
«Elektrondyq eńbek birjasy» arqasynda 1,2 mln-nan astam adam jumys taba aldy. Olardyń ishinde 868 myń adam turaqty jumys oryndaryna, 341 myńy ýaqytsha jumysqa ornalastyryldy», – dedi ministr.
Al «Elektrondyq eńbek sharttary» jobasyna 35 myń uiym qosylǵan. Qazirgi ýaqytta 1,4 mln elektrondyq shart tirkeldi. Bul jumyskerlerdiń eńbek quqyqtaryn qorǵaýǵa yqpal etetin bolady.
«2019 jyldyń basynda memlekettik qyzmetterdi avtomattandyrý bóliginde elektrondyq qyzmetterdiń úlesi 42 paiyzdy qurap edi. 2019 jyldyń qorytyndysy boiynsha ol 83 paiyzǵa artty. Mundai ósimge Egov portalyndaǵy 6 memlekettik kórsetiletin qyzmetti ornalastyrý jáne 10 qyzmetti belsendi formatqa aýystyrý arqyly qol jetkizildi. 2020 jyldyń sońyna deiin biz elektrondyq qyzmetterdiń úlesin 100 paiyzǵa jetkizýdi josparlap otyrmyz», – dedi Birjan Nurymbetov.
