Álemniń 20 eli azyq-túlikke asa muqtaj. Eger tiisti kómek kórsetilmese, bul elderde ashtyq bastalýy múmkin. Mundai eskertýdi BUU-nyń azyq-túlik máselelerimen ainalysatyn eki mekemesi jasady, dep habarlaidy "Ult aqparat" BUU jańalyqtar ortalyǵyna silteme jasap.
Iemen, Ońtústik Sýdan jáne Nigeriia soltústiginiń turǵyndary úshin ashtyq bastaldy delingen Birikken Ulttar uiymynyń Dúniejúzilik azyq-túlik baǵdarlamasy jáne Azyq-túlik jáne aýylsharýashylyq uiymynyń daiyndaǵan baiandamasynda.
Ashtyq qaýpine tap bolǵan elderdiń kóbiniń Afrikada ornalasqanymen, bul problema basqa óńirlerge de qatysty bolyp otyr: Aziiadaǵy Aýǵanstan, Taiaý Shyǵystaǵy Siriia men Livan, Latyn Amerikasyndaǵy Gaiti – osy jáne basqa memleketterge halyqaralyq qaýymdastyqtyń kómegi asa qajet.
Mamandar 34 mln adam «ólimge bir qadam jerde» turǵanyn aitýda.
«Ómirlerdi saqtap qalyp, turǵyndardyń tabys kózderin saqtap qalý jáne jaǵdaidyń odan ári nasharlaýyna jol bermeý úshin sharalar qoldaný – bizdiń ortaq paryzymyz», - dep atap ótti BUU Azyq-túlik jáne aýylsharýashylyq uiymynyń Bas direktory Tsiýi Dýniýi.
Onyń aitýynsha, ashtyqty aldyn alý úshin shuǵyl halyqtyń osal toptaryna gýmanitarlyq kómek kórsetip, qajet dep boljanǵan 5,5 mlrd dollardy jinaý qajet.
