Foto: Áli Muhammadi jeke muraǵatynan
Irannyń Hamadan qalasyndaǵy Ibn Sina atyndaǵy ýniversitettiń professory, tanymal tarihshy Áli Muhammadi qazaq jáne parsy mádenietin zertteýdegi úlken jetistigimen bólisti. Ǵalym áigili Muhammed Haidar Dýlatidiń «Tarih-e Rashidi» eńbegin 20 jyl boiy zerttep, qaita túzetip, úsh tomdyq nusqada basyp shyǵardy, dep habarlaidy Ult.kz.
Bul mańyzdy oqiǵaǵa qatysty Áli Muhammadi:
«Túzetý jumystary uzaq ári qiyn boldy. Kitaptyń árbir nusqasyn muqiiat salystyryp, tarihymyzdyń mańyzdy bóligin qaita jańǵyrttym. Endi bul eńbek Qazaqstan tarihshylary men mádeniettanýshylarynyń qolyna jetedi dep úmittenemin», – dedi.
Foto: Áli Muhammadi jeke muraǵatynan
Zertteýshiniń aitýynsha, «Tarih-e Rashidi» kitabynyń qoljazba nusqalary Ulybritaniia, Úndistan, Resei, Ózbekstan, Tájikstan, Pákistan jáne Iran elderindegi kitaphanalardan alynǵan. Jalpy sany 10 qoljazba nusqany paidalanyp, olardy tolyq túzetýden ótkizýge 20 jyl ýaqyt ketken.
Úsh tomdyq jinaqtyń qurylymy erekshe:
* Birinshi jáne ekinshi tom – negizgi tarihi mátinder (1600 bet);
* Úshinshi tom – eskertýler men túzetýlerge arnalǵan túsindirmeler (900 bet).
Bul jumys Qazaqstanǵa erekshe jaqyn. Áli Muhammadi 2005 jyly Almatyda Abai, Ál-Farabi jáne Abylai han atyndaǵy ýniversitetterde dáris oqyǵan kezinde «Tarih-e Rashidi» kitabymen alǵash tanysqanyn atap ótti. Sol ýaqyttan beri kitapty qaita óńdep basý ideiasyn júzege asyrýǵa bel bailaǵan.
«Saǵdi Shirazi aitqandai, eger Qudaidyń iltipaty tússe, bul eńbek Qytai galereiasy men mármár órnektei bolady», – dep, ǵalym óz jumysynyń mańyzdylyǵyn poetikalyq túrde qorytyndylady.
Ustazdyń negizgi maqsaty - osy kitapqa qazaq ǵalymdarynyń nazaryn aýdartý, arnaiy komissiia qurylyp, qazaqshaǵa aýdarý jumystary qolǵa alynǵanyn kórý.
