Foto: amacumara.ru
Jihankez jýrnalist Dinara Bolattyń ózge paiymy Ult.kz-te.
Tamyz aiynda álemge áigili pop juldyz Djennifer Lopes Astanada kontsert beredi degeli qoǵam dúrligip sala berdi. Aldymen Djei Lonyń kontserti Úkimet deńgeiinde aitylyp, elge 15 myńnan astam týrist keledi, ekonomikalyq áseri 6,5 milliard teńgege deiin jetýi múmkin dep boljandy.
Úkimet basshysy Oljas Bektenovtiń ózi: «Qazaqstandy osyndai kontsertter únemi ótetin mekenge ainaldyrý úshin bul jumysty jalǵastyrý qajet. Úkimet tarapynan tiisti qoldaýdy kórsetemiz», – dep ýáde berdi.
Keiin kontsert bileti satylymǵa shyǵysymen, bilet satatyn Ticketon.kz saityna bir mezette 50 myń adam kirip, sait júktemesi munsha qoldanýshyny kótere almai, aqaý shyqty. Artynsha bul jaǵdaiǵa Ticketon.kz negizin qalaýshy Aleksei Li túsinikteme berip, jaǵdaidy rettegenderin aitty.
Sondai-aq, Djennifer Lopestiń Astanadaǵy kontsertin ótkizýge jaýapty prodiýser Malik Hasenov Qazaqstanda aldaǵy úsh jyl ishinde álemdik deńgeidegi 10 juldyzdyń kontserti uiymdastyrylatytynyn málimdedi.
Aita keteiik, Djennifer Lopes 2025 jyldyń 1 tamyzynda alǵash ret Qazaqstanǵa kelip óner kórsetedi. Ol bizdiń eldi óziniń álemdik Up All Night týrnesine qosqan. Kontsert «Astana Arena» stadionynda ótedi.
Álemdik juldyzdardyń túrli týrnelerine arnaiy shet elge barǵan adam retinde globaldyq deńgeidegi juldyzdyń bizdiń elimizde kontsert berýi qanshalyqty paida, qandai qiyndyqtary bolýy múmkin ekenine óz paiym-kózqarasymdy jetkizeiin.
PAIYM
Óz basym mundai sharalardyń bizdiń elde ótkenin qýanyshpen qoldaimyn. Buǵan deiin reseilik, ýkrainalyq juldyzdardy, dáýiri ótip turǵanda eshqashan Qazaqstanǵa at basyn burmaǵan, suranysy basylǵan túrli sheteldik ánshilerdi qarsy aldyq. Endi álemdik deńgeidegi TOP juldyzdar arqyly jan-jaqty abyroi jinaityn ýaqyt keldi. Ónerden buryn bul biznes, ári imidj. Sol sebepti bul elimiz úshin asa qajet qadam.
Álemdik deńgeidegi kontsert bir keshtik shara bolǵanmen, eki-úsh kúndik týrizm tabysymen para-par. Súiikti ánshisin óz kózimen kórip, jandy daýysta estip, ár qozǵalysyn, áreketin baqylap, súisingisi keletin fanat óner iesi qai elde kontsert berse de sol jerden tabylýǵa daiyn.
Máselen ózim Los-Andjeleske, Singapýrǵa, Bangkok, Abý-Dabige arnaiy tek qana kontsert úshin barǵanmyn.
Foto: Dinara Bolattyń jeke murǵatynan
Favorit oryndaýshyńnyń kontsertine barý qazir týrizmniń bir túrine ainaldy. Sondyqtan keleshekte Astanadan basqa jaqyn jerde kontsert bermeitin juldyzdardy kórý úshin kórshi Ózbekstan, Qyrǵyzstan, Mońǵoliia, Ýkraina, Reseiden de tyńdarmandar keletini haq. Buǵan 2023 jyly Bakýde ǵana kontsert bergen Imagin Dragons tobynyń tájiribesi dálel.
Ádette bul protsess aldyn ala kontsertke bilet satyp alýdan bastap, ol elge jetetin áýe bileti, sol qaladaǵy kontsert ótetin jerge jaqyn ornalasqan qonaq úidi brondaý, qaladaǵy kofeinia, meiramhanalarynan tamaq ishý, jańa qalaǵa baryp turyp kórýiń kerek qyzyqty, tanymdyq jerlerdi belgileý, qoǵamdyq kólik, taksimen jetý marshrýttaryn syzý sekildi áreketterden turady. Bir qalada álemdik deńgeidegi kontsert ótedi degen sóz ‒ sol kúnderi turǵyndardyń kemi 30-35 paiyzy bul sharamen bailanysty bolady degendi bildiredi.
Foto: Dinara Bolattyń jeke murǵatynan
Alaida biz ázirge tabys týraly aita almaimyz. Sebebi Djennifer Lopes kontsertiniń piar kompaniiasy bastalmai jatyp, bilettiń kópshiligi óz qazaqtarymyzǵa satylyp ketti. Degenmen osy sharadan abyroimen ótsek aldaǵy ýaqytta túrli elden qonaqtar qarsy alatyn múmkindigimiz bar. Tek sol kezde Astana túrli qalta múmkindigimen qonaqtardy qarsy alýǵa daiyn bolýy kerek. Sebebi, bizge The Ritz-Carlton, Rixos, Sheraton sekildi joǵarǵy sanattaǵy qonaq úilerge ońai aqsha tóleitin AQSh, Eýropa azamattary emes, ortasha tabysty kórshi el adamdary keledi. Al meniń baiqaýymsha Astana qalasynda qoljetimdi baǵa usynyp, úlken týristik aǵynǵa sáikes nómirlik qory jetkilikti qonaq úiler óte az.
Ekinshi negizgi másele, kontsert ótetin Astana Arenanyń múmkindigi men ol jerdegi sharanyń durys uiymdastyrylýy. Ádette Djennifer Lopes óz kontsertterinde vizýaldy, emotsionaldy áser qaldyrý úshin baryn salady. Bul mega júldyz úshin ‒ effekt, shoý basty sóz. Djei Lo qalaityn nátijeni qamtamasyz etý úshin Astana Arenada mýltideńgeili sahnalar, ainalmaly platforma, tik kóteriletin lift, joǵarǵy ruqsattaǵy animatsiialyq LED ekrandar jáne t.b. ozyq tehnologiialyq múmkindikter bolýy shart. Munyń barlyǵyn birdei buǵan deiin Astana Arenadan baiqaǵan emespin. Biraq kórermenin syilaityn, ózine, ónerge talǵamy zor juldyzdardyń arqasynda arena bir jabdyqtalyp qalady degen úmittemin.
Aldaǵy ýaqytta Astanada kóptegen álemdik juldyzdardyń kontserti ótedi dep boljanyp otyr. Shildede Astanada ótetin Djennifer Lopestiń kontsertinen biýdjetke túsetin tabys týraly aitý áli erte. Tabys bolmaýy da múmkin. Degenmen mundai aýqymdaǵy mádeni shara bizdiń el úshin teńdessiz tájiribe. Ázirge bizge kelgeli jatqan juldyzdardyń jankúierleri orta jasta. Al naǵyz jastardyń suranysy K-pop ártisteri. Ol sanattaǵy oryndaýshylar bizge nazaryn burýy úshin bul ádemi bastama. Sondyqtan, buǵan deiin bizdi asa tanymaǵandar Astanany Orta Aziiadaǵy mega aýqymdy sahnanyń biregeii dep tanityn imidj qalyptastyrý úshin osy sharadan abyroimen ótý buiyrsyn.
Dinara Bolat
.jpg)
