20 qarasha kúni Nazarbaev Ýniversitetinde ult ustazy Ahmet Baitursynulynyń 5 tomdyq shyǵarmalar jinaǵynyń tusaýkeseri ótti. Akademiialyq jinaq “Alash” qozǵalysynyń kósemi Ahmet Baitursynulynyń ómir boiy jazǵan eńbekterin biriktirgen, dep habarlaidy ult.kz.
Akademiialyq jinaq avtordyń kózi tirisinde shyǵarǵan shyǵarmalarynyń tolyq mátinderin jáne kazirgi ǵalymdardyń ǵylymi túsiniktemelerin qamtidy.
Ahmet Baitursynulynyń eńbekterin zertteitin kóptegen kitaptar jaryq kórgen, degenmen ǵalymnyń shyǵarmalaryn tolyqtai zerttep, olarǵa ǵylymi turǵydan túsinikteme beretin Akademiialyq jinaqtardyń sany az. Bul týraly Alashtanýshy ǵalym Aigúl Isimaqova aitty.
"Ahmet Baitursynulynyń Akademiialyq tolyq shyǵarmalar jinaǵy tuńǵysh ret shyǵyp otyr. Buǵan deiin biz Abai Qunanbaiulynyń akademiialyq shyǵarmalar jinaǵyn shyǵarǵan edik. Búgingi shyǵyp otyrǵan 5 tomdyq jinaq, ǵalymnyń kózi tirisinde shyǵarǵan óz shyǵarmalarynyń tolyq mátinderin jáne biz oǵan bergen ǵylymi túsiniktemelerdi qamdidy", -deidi ol.
Ult ustazy Ahmet Baitursynulynyń 5 tomdyq shyǵarmalar jinaǵynyń tusaýkeserine elimizdiń Alashtanýshy ǵalymdary, Ahmet Baitursynulynyń urpaǵy Erahan Qabyluly men depýtattar qatysty.
Tusaýkeser rásiminde sóz sóilegen qonaqtar Ult ustazynyń eleýli eńbekterin eske alyp, jazýshynyń óleńderinen shýmaq oqydy.
Sondai-aq, Alashtanýshy ǵalym Qairat Ómirbaiuly Saq, Ahmet Baitursynulynyń 5 tomdyq jinaǵyn "ǵalymnyń qurmetine qoiylǵan eń qundy eskerkish" dep atady.
Shyn máninde Ahmet Baitursynulynyń shyǵarmalar jinaǵy qazirgi tańdaǵy eń qundy kitaptardyń biri bolyp otyr. Óitkeni, ult ustazynyń mektep qabyrǵasyndaǵy búldirshinge de, bilim alýǵa umtylǵan tyńdaýshyǵa da paidaly bolatyn eńbekteri jeterlik. Sol eńbekterdiń Akademiialyq jinaq bolyp jaryq kórgeni úlken qýanysh. Bul jinaq el jastaryna paidaly oqýlyq qyzmetin atqarady. Bul týraly Qazaqstan Parlamenti májilisiniń depýtaty Juldyz Súleimenova da aityp ótti.
"2016 jyldan bastap elimiz úsh tildilik saiasatyn júrip jatty. Sol kezde álippe mektep oqýlyqtarynan alynyp tastaldy. 2019 jylǵa deiin oqý saýattylyǵy degen sabaq engizildi. 2019 jyly memleket basshysy Qasym-Jomar Toqaev "tamyz keńesinde" ustazdarmen kezdesip, Ahmet Baitursynulynyń álippesin mektepterge qaitaramyz dep ýáde etken edi. Sodan keiin, 2020 jyly álippe mektep oqýlyqtaryna qaita engizildi. Qazir mektep oqýshylary Ahmet Baitursynulynyń álippesimen bilim alyp, saýat ashyp jatyr. Bunyń ózin memleket basshysynyń ult ustazyna degen qurmeti dep bilemiz. Bolashaq ǵalymdar, bilim alyp júrgen jastar Ahmet Baitursynulynyń ádebi, rýhani, til bilimi týraly jazylǵan barlyq shyǵarmalary men zertteýlerin tolyq oqýlaryńyz qajet", -dedi Juldyz Súleimenova.
Ahmet Baitursynulynyń shyǵarmalary tek elimizde emes búkil túrki halqynyń ǵalymdary arasynda da tanymal. Bul týraly Ahmet Baitursynulynyń 5 tomdyq Akademiialyq jinaǵynyń ǵylymi jetekshisi Aigúl Isimaqova da aityp ótti.
"Álemdik deńgeidegi ǵalymdar Ahmet Baitursynulynyń kim ekenin biledi. Ásirese ony Túrki halyqtarynyń uly ustazy deýge laiyq deidi ǵalymdar. Kóptegen ǵalymdar onyń eńbekterine tań qalýda. Solai eken ǵylymi elitamyzdy jastarǵa tanytatyn kez keldi", -dep otyr Aigúl Isimaqova.
Bekbolat MUHTAROV
