Álemdegi ahýal bizge selqos júretin ýaqyttyń joqtyǵyn kórsetti. Qasym-Jomart Toqaevtyń VII shaqyrylymdaǵy Parlamenttiń birinshi sessiiasynda kótergen bastamalary jaiynda QR Prezidenti janyndaǵy QSZI ǵylymi qyzmetkeri Álisher Ábdireshev osylai dedi, dep habarlaidy QazAqparat.
«Ótken sailaý Qazaqstan úshin reformalar men memlekettiń jan-jaqty damýynyń jańa esigin ashady. Jańa jyl, ózderińiz biletindei, bizdiń memleketimiz úshin mereitoily jyl. Osyǵan bailanysty Prezident Qazaqstannyń jáne onyń árbir azamatynyń basymdyǵy - qoǵamnyń ál-aýqatyn nyǵaitý bolýy kerektigin atap ótti. Prezident álemniń damyǵan 30 eliniń qataryna kirý - negizgi maqsat retinde kún tártibinen túspeitinin saldy. Jahandyq shielenis pen ekonomikalyq daǵdarys jaǵdaiynda bul mindet odan da mańyzdy bola túsedi», - dedi Álisher Ábdireshev.
Sarapshy Memleket basshysynyń birqatar basymdyqqa erekshe toqtalǵanyn eske saldy.
«Ol basymdyqtarǵa biyl memlekettik apparattyń negizgi nazary aýdarylary anyq. Oǵan memlekettik basqarýdyń jańa modeli, sot júiesiniń reformasy, adam kapitalynyń sapasyn arttyrý qajettiligi, biznes júrgizý sharttaryn jaqsartý, elektrondy júieni odan ary liberalizatsiialaý isteri enedi. Prezident aitqan barlyq aspekt bizge el basshylyǵynyń halyqpen bailanysta ekenin jáne olardyń ótinishteri, qajettilikterin naqty bilip otyrǵanyn aiqyn kórsetedi», - dedi sarapshy.
Álisher Ábdireshev koronavirýs pandemiiasy búkil álemge, onyń ishinde Qazaqstanǵa da densaýlyq saqtaý salasynyń mańyzdylyǵyn túsindirgenin atap ótti.
«Ókinishke qarai bizdiń azamattar sapaly meditsialyq qyzmet alý jaǵynan kóptegen problemamen betpe-bet keledi. Ásirese pandemiianyń shyrqaý sheginde bul másele erekshe sezildi. Aýrýhanalardaǵy ahýal sol tusta qandai bolǵanyn bárińiz de bilesizder. Osyǵan bailanysty Memleket basshysy otandyq densaýlyq saqtaý salasyn jańǵyrtýdyń mańyzdylyǵyna erekshe toqtaldy. Ol eń aldymen patsientter men onyń múddelerine baǵyttalýy tiis. Májilistiń quramyna óz salalarynyń kóptegen jańa mamandary kirdi. Jańartylǵan quram jumystyń alǵashqy kúninen bastap-aq óziniń tiimdiligin kórsetýi kerek. Álemdegi jaǵdai bizge terbelip júretindei ýaqyttyń joqtyǵyn kórsetti. Sondyqtan Qazaqstan Respýblikasy óziniń strategiialyq baǵdaryn jalǵastyra otyryp, artta qalmaýy kerek», - dedi ol.
