Qadirli jerlesterim, baǵa jetpes bailyǵym – halqym! Qazir biz asa aýyr kezeńde turmyz. Mundai syni shaqta qazaqqa aýyzbirlik aýadai qajet.
Óitkeni máńgilik eldiń basty qýaty – onyń birliginde, qiyndyqty tabandylyqpen eńsere alýynda. Ulan baitaq qazaq jerin aq naizanyń ushymen, aq bilektiń kúshimen saqtap qalǵan babalar jeńisiniń basty kilti – osy birliginde bolatyn. Alaýyzdyqqa boi aldyrǵan talai memlekettiń toz-toz bolyp, jer betinen joq bolyp ketkenine kári tarih kýá. Sodan sabaq alýymyz kerek. Óitkeni búgingi bizdiń betpe-bet kelip otyrǵan jaǵdaiymyz da maidannyń bir túri. Qarý alyp soǵys dalasyna shyqpaǵanymyzben, aqyl-parasat, sana men mádeniettiń synǵa túser shaǵy.
Sondyqtan da Prezidentimiz Qasym-Jomart Toqaevtyń qabyldap jatqan sheshimderine tolyq qosylyp, bir jaǵadan bas, bir jeńnen qol shyǵaratyn asa jaýapty, kezek kúttirmes kezeńge keldik. Qazirgi jaǵdaida bárimizdi jeke bas múddesi emes, tutas ult bolyp qalý máselesi alańdatýy kerek. Al eńseli el bolyp, qanatymyzdy keńge jaiýymyz qazaqtyń amandyǵyna, iaǵni árqaisymyzdyń ult aldyndaǵy jaýapkershilikti sezinýimizge tikelei bailanysty. Sebebi bul jaǵdaidaǵy bizdiń árbir salǵyrt áreketimiz, nemquraily nietimiz erteń orny tolmas ókinishke alyp kelýi múmkin.
Ras, qazir halyq sharasyzdyqtan ashýǵa boi aldyrǵan. Qorqynysh pen úrei basym. Ol zańdy da. Alaida bul úrei tek óz ómiri men jaqyndarynyń saýlyǵy úshin ǵana emes, tutas ulttyń amandyǵymen astasyp jatýy kerek. Bizge qazir meiirim aýadai qajet. Bir-birimizge degen qamqorlyq, jylylyq hám aýyzbirlik qana bul ajdaha indettiń qursaýynan aman alyp qala almaq.
Indet elimizdegi bailar men kedeiler arasyndaǵy teńsizdikti, adamdardyń turmysy arasyndaǵy alshaqtyqty aiqyn kórsetip berdi. Júrekti aýyrtatyn da osy jaǵdai. Bizge endi shynymen oilaný kerek. Adam bailyqty qansha jiǵanymen, qattalǵan qazynasyn qyzǵyshtai qoryǵanymen, qara jerge ózimen birge alyp kete almaidy. Esesine, osyndai qiyn shaqta muqtaj jandarǵa qol ushyn sozyp, mol saýapqa kenele alady. Iaǵni ómirdiń máni – bailyqta emes, denniń saýlyǵynda, adamzattyń amandyǵynda eken. Álemdi jailaǵan myna jaǵdai sol peiilimizdiń kórinisi shyǵar bálkim, kim bilsin?
Óitkeni búgingi zamanda adamnyń peiili tarylyp, qý dúnieniń quly bolyp ketti. Sonyń saldarynan meiirim, júrek, jan jylýy syndy adami aiaýly sezimder, rýhani qundylyqtardyń qadiri de quldyrady. Bul indet osy nietimizdi túzep, ár adamnyń ómir máni týrasynda oilanýyna jiberilgen synaq pa dep te oilaimyn. Kún saiyn estirtip jatqan ólim men joqtaý sai-súiegińdi syrqyratady. Jaratqan iem jaqyndarymyzdy joǵaltýdan, qazaqtyń qynadai qyrylýynan saqtaǵai!
Oilansaq eken! Túisikpen túsinsek eken. Ár adam óz áreketi, saqtyq sharalaryn saqtaýy arqyly kúlli álemdi qutqarýǵa septese alatyndyǵyn uǵynsa eken. Halqym toi-tomalaqty, jiyn-basqosýlardy shektei turyp, ult saýlyǵyn birinshi orynǵa qoisa degen úlken tilegim bar.
Túsinemin, ailar boiy tórt qabyrǵaǵa qamalyp otyrý ońai emes. Biraq qiyn da bolsa bul synaqqa tózýimiz qajet. Elimizdiń erteńi, jastardyń bolashaǵy úshin! Mine, 4 aidan asa ýaqyt úide otyrmyn. Men de ábden jalyǵyp kettim. Biraq amal qansha?! Tózýimiz kerek! Sebebi árqaisymyzdyń áreketimizdiń artynda ulttyń bolashaǵy, barsha adamzattyń amandyǵy tur. Prezidentimiz Qasym-Jomart Toqaev ta osy bir qiyn jaǵdaidan shyǵýdyń jolyn izdep shyryldap júr. Elimizdiń tizginin ustaǵan arda azamatqa dál qazirgi qiyn shaqta qoldaý bildirýimiz kerek.
Ultymyzdy aman alyp qalý deitin uly ideianyń, maǵynaly maqsattyń tóńiregine uiysýymyz kerek. Árbir adam, qyzmetker osy syndy eńserý úshin de janyn salýy, adal qyzmet etýi qajet. Olai bolmaiynsha, jaǵdaiymyz qiyn. Jolairyqqa kelip turmyz ba dep te oilaimyn keide. Ótkende Prezident aitqandai, qazir toi toilaityn emes, tutas ult bolyp uiysýdyń, aman qalýdyń jolyn oilap, izdeitin ýaqyt.
Qazaqshylyqty qoiyp, adamshylyqqa kóshýimiz kerek! Óitkeni álemdi meiirim men adamshylyq qana qutqara alady! Osyny bir sátte esimizden shyǵarmasaq eken!
Alla laiym amandyǵymyzdan aiyrmasyn!
Asanáli Áshimov,
KSRO jáne Qazaqstannyń halyq ártisi,
Qazaqstannyń Eńbek Eri, Memlekettik syilyqtyń laýreaty
"Egemen Qazaqstan" gazeti
