Djons Hopkins ýniversitetiniń dereginshe, 9 qazan kúni álemde 350 myńǵa jýyq adamnan Covid infektsiiasy anyqtaldy. Bul – buryn-sońdy bolmaǵan kórsetkish. Epidemiia bastalǵaly 36,8 million adamnyń koronavirýs infektsiiasyn juqtyrǵany rastaldy. Millionnan astam naýqas qaitys boldy.
Sondai-aq sońǵy táýlikte álem boiynsha COVID-19 virýsynan kem degende 5514 naýqas kóz jumǵan.
Rastalǵan Covid naýqastary boiynsha kósh basynda AQSh, Úndistan jáne Braziliia tur.
Tórtinshi orynda turǵan Reseide (anneksiialanǵan Qyrymdy qosqanda) táýlik ishinde 12 126 adamnan koronavirýs anyqtaldy. Bul – indet bastalǵaly tirkelgen eń joǵarǵy kórsetkish. Munyń aldyndaǵy rekord 11 mamyr kúni tirkelgen. Ol kúni virýs 11 656 adamnan tabylǵan. Elde barlyǵy 1,3 millionǵa jýyq adamnyń Covid infektsiiasyn juqtyrǵany rastalǵan.
Djons Hopkins ýniversitetiniń Covid-kartasynda Qazaqstan 108 663 naýqaspen 38-orynda tur. Ýniversitet esepke tek PTR testimen rastalǵan naýqastar deregin ǵana alady. bul statistikada koronavirýs juqtyrǵany diagnozy boiynsha anyqtalǵan pnevmoniia naýqastary kórsetilmegen. Qazaqstan olardyń esebin 1 tamyzdan beri júrgizip keledi. Resmi derek boiynsha, 1 tamyz ben 10 aralyǵynda 34 617 adamǵa koronavirýs pnevmoniiasy diagnozy qoiylǵan. Eger ekeýin qossa, Qazaqstan 32-orynǵa kóteriledi.
Indet kúrt órshý birneshe elde baiqalyp otyr. Qyrkúiektiń sońynda Izrail karantin shekteýlerin qaita engizdi. Odan keiin Chehiia, Slovakiia, Italiia jáne Ulybritaniia da karantin talaptaryn kúsheitti. Sharalar kóbine kafeler men restorandar jumysyn shekteýdi, adam kóp qatysatyn is-sharalardy azaitýdy, maska taǵyp júrýdi qamtidy. Birqatar elde bilim berý qashyqtan júrgizile bastady.
