Álemde koronavirýs juqtyrǵandar 2 million adamǵa jýyqtady. Djon Hopkins ýniversitetiniń dereginshe, álemde 1 mln 986 myń adamnan koronavirýs tabylǵan. Shamamen 127 myń adam qaitys bolǵan. 494 myńnan astam adam jazylǵan.
Virýs juqtyrǵandar men qaitys bolǵandar sany jaǵynan AQSh bárinen alda tur. Munda jarty millionnan astam adamnan virýs tabylǵan. Ispaniiada - 172 500, Italiiada – 159 500, Frantsiiada – 137 800, Germaniiada – 130 400 adamǵa virýs juqqany anyqtalǵan.
Aita keteiik, dúniedegi kúrdeli ahýalǵa bailanysty Halyqaralyq valiýta qory Afrikanyń 19 memleketiniń qaryzyn keshirdi. Olardyń arasynda Mali, Býrkina-Faso, Niger, Malavi jáne Mozambik bar. HVQ atqarýshy direktory Kristalina Georgievanyń pikirinshe, qaryzdy keshirý kedei elderge qarjylyq resýrsty virýspen kúresýge jumsaýǵa múmkindik beredi.
