Germaniia quramasy fýtboldan Álem chempionatynyń alǵashqy matchynda jeńilip qaldy, - dep habarlaidy Massaget.kz portaly.
Dohadaǵy "Halifa" stadionynda Germaniia E toby aiasynda Japoniia quramasymen kezdesti. Nemis fýtbolshylary úshin bári sátti bastalǵan. Olar oiyndy birden baqylaýyna aldy. 33-minýtta Ilkai Giýndogan penaltiden gol soǵyp, Germaniiany alǵa shyǵardy. Birinshi taim aiaqtalar tusta nemis fýtbolshylary ekinshi golyn soqqan - biraq Kai Haverts ofsaidta qalyp, bul dop esepke alynbady.
Ekinshi taim da Germaniia quramasynyń basymdyǵymen bastaldy, dopqa kóbirek ielik etti. Biraq japon fýtbolshylary sát saiyn qarymta shabýyldar jasap, Manýel Noier qaqpasyn torýyldaýmen boldy. Bul nátijesin berdi. 75-minýttaǵy jyldam shabýyldyń biri kezinde Noier alǵashqy soqqyny toqtata alsa, keri serpilgen dopty Ritsý Doan bos qaqpada týlatty.
Al kezdesý sońyna qarai aziialyq qurama jeńisti julyp áketti. Taǵy bir qarymta shabýyl jasap, Takýmo Asano jaqyn buryshqa joiqyn soqqy jasady. Sońǵy ysqyryqqa deiin nemis fýtbolshylary esepti teńestirýge tyrysqanymen, Japoniia qorǵanysta myǵym boldy. Qorytyndy esep - 2:1, japon fýtbolshylary sensatsiia jasady.
Endi Germaniia quramasy kelesi matchin 27 qarashada azýly Ispaniia quramasyna qarsy ótkizedi. Al japondar endi Kosta-Rikamen kúsh synasady.
Aita keteiik, buǵan deiin Argentina quramasy kútpegen jerden Saýd Arabiiasynan jeńilip qalǵan edi.
