گەرمانييا قۇراماسى فۋتبولدان ەلەم چەمپيوناتىنىڭ العاشقى ماتچىندا جەڭٸلٸپ قالدى, - دەپ حابارلايدى Massaget.kz پورتالى.
دوحاداعى "حاليفا" ستاديونىندا گەرمانييا ە توبى اياسىندا جاپونييا قۇراماسىمەن كەزدەستٸ. نەمٸس فۋتبولشىلارى ٷشٸن بەرٸ سەتتٸ باستالعان. ولار ويىندى بٸردەن باقىلاۋىنا الدى. 33-مينۋتتا يلكاي گيۋندوگان پەنالتيدەن گول سوعىپ, گەرمانييانى العا شىعاردى. بٸرٸنشٸ تايم اياقتالار تۇستا نەمٸس فۋتبولشىلارى ەكٸنشٸ گولىن سوققان - بٸراق كاي حاۆەرتس وفسايدتا قالىپ, بۇل دوپ ەسەپكە الىنبادى.
ەكٸنشٸ تايم دا گەرمانييا قۇراماسىنىڭ باسىمدىعىمەن باستالدى, دوپقا كٶبٸرەك يەلٸك ەتتٸ. بٸراق جاپون فۋتبولشىلارى سەت سايىن قارىمتا شابۋىلدار جاساپ, مانۋەل نويەر قاقپاسىن تورۋىلداۋمەن بولدى. بۇل نەتيجەسٸن بەردٸ. 75-مينۋتتاعى جىلدام شابۋىلدىڭ بٸرٸ كەزٸندە نويەر العاشقى سوققىنى توقتاتا السا, كەرٸ سەرپٸلگەن دوپتى ريتسۋ دوان بوس قاقپادا تۋلاتتى.
ال كەزدەسۋ سوڭىنا قاراي ازييالىق قۇراما جەڭٸستٸ جۇلىپ ەكەتتٸ. تاعى بٸر قارىمتا شابۋىل جاساپ, تاكۋمو اسانو جاقىن بۇرىشقا جويقىن سوققى جاسادى. سوڭعى ىسقىرىققا دەيٸن نەمٸس فۋتبولشىلارى ەسەپتٸ تەڭەستٸرۋگە تىرىسقانىمەن, جاپونييا قورعانىستا مىعىم بولدى. قورىتىندى ەسەپ - 2:1, جاپون فۋتبولشىلارى سەنساتسييا جاسادى.
ەندٸ گەرمانييا قۇراماسى كەلەسٸ ماتچٸن 27 قاراشادا ازۋلى يسپانييا قۇراماسىنا قارسى ٶتكٸزەدٸ. ال جاپوندار ەندٸ كوستا-ريكامەن كٷش سىناسادى.
ايتا كەتەيٸك, بۇعان دەيٸن ارگەنتينا قۇراماسى كٷتپەگەن جەردەن ساۋد ارابيياسىنان جەڭٸلٸپ قالعان ەدٸ.
