Belgradta bokstan álem chempionatynyń ekinshi jarys kúni jalǵasyp jatyr. Keshki sessiia Qazaqstan jáne Ózbekstan boksshysynyń jekpe-jegimen bastaldy, dep habarlaidy "Ult aqparat".
1/16 finalda 51 keli salmaqta synǵa túsetin otandasymyz Sáken Bibosynov pen Ózbekstan ókili, Rio Olimpiadasynyń chempiony Hasanboi Dýsmatov kezdesken bolatyn. Tartysty jekpe-jekte 5:0 esebimen Bibosynov jeńiske jetti.
Osylaisha, Tokio Olimpiadasynyń qola júldegeri azýly qarsylasynan ailasyn asyryp, kelesi ainalymǵa ótti.
Sondai-aq, búgin taǵy bir qazaqstandyq Nurqanat Raiys 75 kelide 1/32 finalda chernogoriialyq Stefan Savkovichpen sheberlik baiqasady.
Eske salsaq, 25 qazanda ótken jarystyń alǵashqy kúninde ulttyq qurama kapitany Abylaihan Júsipov (67 keli) pen Serik Temirjanov (57 keli) 1/16 finalǵa ótti.
