Densaýlyq saqtaý ministri Aleksei Tsoi kóshede maska taǵý halyqqa nelikten mindettelip otyrǵanyn túsindirdi, dep habarlaidy QazAqparat.
«Qazirgi tańda Qazaqstanda koronavirýs infektsiiasyn juqtyrý jaǵdaiy táýligine 1500-1600 adam deńgeiinde turaqtalyp qaldy. Máselen Nur-Sultanda jedel járdemge júginý 22 maýsymnan 30 shilde aralyǵynda úshten ekige azaidy. Sonymen birge koronavirýs infektsiiasy boiynsha shaqyrtýlar táýligine 500-den 86-ǵa deiin tómendedi. Sol sekildi jedel járdemdi shaqyrý jaǵdaiy 3 myńnan 1 myńǵa deiin tústi. Statsionarlardyń tolymdylyǵy 96 paiyzdan 35,7 paiyzǵa deiin azaidy», - dedi Aleksei Tsoi OKQ-da ótken baspasóz máslihatynda.
Ministr sonymen qatar Shymkent qalasynda da jedel járdem qyzmetin shaqyrý deńgeii 43 paiyzǵa kemigenin aityp ótti.
«Búkil Qazaqstan boiynsha provizorlyq statsionarlar da jabylýda. Burynǵy, iaǵni qalypty jumys tártibine oralyp jatyr. Olar qazir rezervte. Tósek oryndary boiynsha qosymsha qajettilik týyndaǵan jaǵdaida olar qosymsha jasaqtalady», - dedi ol.
Aleksei Tsoi karantin taǵy eki aptaǵa sozylatyndyqtan búkil el bolyp, kásip ieleri bolyp qalypty ómirge qaitý úshin daiyndyq jumystary júrgizilýi kerektigin jetkizdi.
«Densaýlyq saqtaý ministrligi koronavirýs infektsiiasynyń taralý qaýpin eskertý úshin halyqtyń karantin talaptaryn saqtaýyna qatysty birqatar uiymdastyrýshylyq jáne quqyqtyq sharalar qabyldandy. Densaýlyq saqtaý ministrligi jaýapty organdarmen birge azamattardy karantin sharalaryn saqtamaǵan jaǵdaida ákimshilik jaýapkershilikke tartý tártibin bekitti. Bul rette maskany taǵyp júrý – KVI-di juqtyrý qaýpin 30 paiyzǵa azaitady. Osy jaidy eskere otyryp, 2020 jyldyń 30 shildesinen bastap Densaýlyq saqtaý ministrligi buiryq shyǵardy. Oǵan sáikes azamattar qoǵamdyq orynda, kóshede maska taǵyp júrýge mindetteledi», - dedi ol.
Sondai-aq Aleksei Tsoi búgingi kúni AQSh-tyń 43 shtatynda, Polshada, Avstraliiada, Slovakiia men Vetnamda qoǵamdyq orynda maska taǵý mindetti ekendigin jetkizdi.
Eske sala ketsek, Qazaqstannyń memlekettik bas sanitarlyq dárigeri Aijan Esmaǵambetovanyń qaýlysy boiynsha halyqqa Qazaqstanda kóshede mindetti túrde maska taǵyp júrý mindettelgen bolatyn.
