Belarýs Qazaqstannan tasymaldanatyn munai boiynsha kelissóz júrgizip, osy baǵyttaǵy bailanysty jandandyrýǵa nietti.
Bul týraly Belarýs Prezidenti Aleksandr Lýkashenko Qazaqstannyń Belarýstaǵy Tótenshe jáne Ókiletti elshisi Ermuhamet Ertisbaevpen kezdesýinde málim etti, dep habarlaidy QazAqparat tilshisi BELTA-ǵa silteme jasap.
«Qazirgi ýaqytta biz kómirsýtek shikizatyn tasymaldaýdyń ártaraptandyrýmen ainalysyp jatqanymyzdy biletin bolarsyzdar. Bizde birneshe nusqa bar. Belarýs basqa jerden de munai tasymaldaý baǵytynda kelissózder júrgizý ústinde. Biyl munai óńdeitin zaýyttardy jańǵyrtý jumysyn aiaqtaimyz. Sol sebepti, bizge álemdik naryqtan munaidy satyp alý jeńildei túsedi. Bul baǵyttaǵy kelissózderdi bastap kettik te. Endi Belarýsqa qazaqstandyq munaidy jetkizý boiynsha kelissóz jandansa deimiz. Bul máseleni sheshe alatyn sekildimiz. Ol Belarýs pen Qazaqstannyń ǵana kelissózimen sheshilmesi anyq. Ortada Resei tranziti jatyr. Resei - EEEO múshesi. Bizge jaqyn elmen Qazaqstan munaiynyń belgili bir bóligin tasymaldaý baǵytynda kelisip alatyn sekildimiz», - dedi Aleksandr Lýkashenko.
Belarýs basshysy Qazaqstan pen Belarýs arasyndaǵy saýda-ekonomikalyq qarym-qatynasta eshqandai másele joqtyǵyn atap ótti.
«Belarýs baǵytyndaǵy saýdada disbalanstyń bary qupiia emes. Biraq, Qazaqstanda bizge kerekti taýarlardyń túr-túrin shyǵaratynyn bilýińiz kerek. Maqtadan bastap metallǵa deiingi qajettilikterdiń bári kerek. Biz KSRO kezindegidei Sizderden bidai satyp alýǵa daiynbyz. Sol sebepti, saýda jaǵynan balansty rettep alý asa qiynǵa soqpaidy. Bizdiń Úkimetaralyq komissiiaǵa osy máselemen ainalysýdy tapsyrý kerek degen oidamyn», - deidi ol.
Aleksandr Lýkashenkonyń aitýynsha, eki memleket pen elderdiń basshylary arasynda qashan da izgi qarym-qatynas saqtalǵan.
«Biz Belarýs pen Qazaqstan arasynda aitarlyqtai myqty qarym-qatynas júiesin ornattyq. Taýar ainalymy jaǵynan milliardtyq kórsetkishke qol jetkizdik. Áleýet barshylyq», - deidi Aleksandr Lýkashenko.
Belarýs Prezidenti óz sózinde ekijaqty qarym-qatynastyń bekemdele túsýine «Bir beldeý - bir jol» qytailyq baǵdarlamasy yqpal etetinin tilge tiek etti.
Aita keterligi, ótken jyly eki el arasyndaǵy taýar ainalymy 900 mln dollarǵa jetken bolatyn. Bul 2017 jyldyń kórsetkishimen salystyrǵanda 30 paiyzǵa kóp. Bul rette belarýstyq eksporttyń mólsheri 783 mln dollarǵa jetken edi. 2019 jyldyń alǵashqy toqsanynda eki eldiń arasyndaǵy saýda qarym-qatynasy 10 paiyzǵa azaiǵan bolatyn.
Belarýs óz kezeginde munai ónimderin, tas kómirdi, relster men maqta, sarymsaq importtap otyr. Qazirgi ýaqytta Qazaqstanda 40-qa tarta Belarýs kompaniiasy jumys istep tur.
