Kásipqoi tennisshiler qaýymdastyǵy (ATP) jańartylǵan reitingini jariia etti, dep habarlaidy QazAqparat.
Qazaqstannyń birinshi raketkasy Aleksandr Býblik álemdegi úzdik otyz tennisshiniń qataryna kirdi.
Ol 31-den 30-orynǵa kóterilip, óziniń rekordtyq kórsetkishine qol jetkizdi.
Mihail Kýkýshkin 168-den 166-ǵa, Dmitrii Popko 180-nen 178-ge joǵarylady.
Reiting kóshin burynǵysha serbiialyq Novak Djokovich bastasa, reseilik Daniil Medvedev ekinshi, germaniialyq Aleksandr Zverev úshinshi orynda keledi.
Juptyq synda Andrei Golýbev 31-den 34-ke, Býblik 67-den 72-ge syrǵysa, Aleksandr Nedovesov 68-den 63-ke shyqty.
Áielder arasynda aýstraliialyq Eshli Barti, Belarýs ókili Arina Sobolenko, chehiialyq Barbora Kreichikova alǵashqy úshtikte tur.
Qazaqstannyń birinshi raketkasy Elena Rybakina 16-dan 20-satyǵa jaiǵassa, Iýliia Pýtintseva 42-den 39-ǵa, Zarina Diias 114-ten 113-ke joǵarylady.
Juptyq synda Anna Danilina óziniń rekordtyq kórsetkishterin jalǵastyrýda. Bul joly ol 23-ten 22-orynǵa kóterildi. Rybakina 51-den 48-satyǵa joǵarylady.
Qazaqstandyq tennisshiler osy aptadaǵy jarystarda tabysty óner kórsetse, reitingtegi kórsetkishterin jaqsarta alady.
Atap aitqanda, Býblik júlde qory 2,8 mln AQSh dollaryna jýyqtaityn Dýbai ATP 500 týrniriniń alǵashqy ainalymynda álemniń 11-raketkasy, Polsha ókili Hýbert Gýrkachpen synǵa túsedi. Ol sondai-aq juptyq synda túrkiialyq Altýg Chelikbilekpen birge irikteý saiysyn sátti ótkizip, negizgi týrnirge joldama aldy. Bul juptyń alǵashqy qarsylastary – Gýrkach pen italiialyq Iannik Sinner.
Rybakina búgin júlde qory 2,6 mln AQSh dollarynan asatyn Doha WTA 1000 jarysynda bastapqy kezdesýin dúniejúzilik reitingte 71-orynda turǵan rýmyniialyq Jaklin Adina Kristianmen ótkizedi.
