Strategiialyq josparlaý jáne reformalar agenttiginiń tóraǵasy Qairat Kelimbetov Prezident tóraǵalyǵymen ótken Reformalar jónindegi Joǵary keńestiń úshinshi otyrysynda qandai máseleler qyzý talqylanǵanyn aityp berdi, dep habarlaidy QazAqparat.
«Reformalar jónindegi Joǵary keńestiń búgingi otyrysynda memlekettik josparlaýdyń jańa júiesin kóp talqyladyq. Pikirtalasqa qatysýshylardyń bárine de bul suraq óte qyzyqty dep oilaimyn. Sebebi kóp másele sheshimdi qabyldaý júiesine tikelei bailanysty. Sondyqtan bul júieni qalai quryp, birinshi kezekte qandai shara qabyldanýy kerektigi jóninde másele kóp talqylandy. Osynyń nátijesinde Joǵary keńestiń otyrysynan keiingi áreketter legin belgileýde óte oily sheshim qabyldandy dep oilaimyn», - dedi Qairat Kelimbetov sarapshy Rahym Oshaqbaevpen «Habar 24» arnasynda júrgizgen suhbatynda.
Onyń aitýynsha, memlekettik josparlaý júiesi fýndamentaldy negizge berik bailanǵan.
«Memlekettik josparlaý júiesi Qazaqstan 30 jyl buryn tańdap alǵan ekonomikalyq jáne saiasi baǵdardy maquldaidy. «Qazaqstan 2030», «Qazaqstan 2050» strategiialarymen birge Ult jospary – bes institýtsionaldyq reformanyń qabyldanǵanyn bilesizder. Olardyń bári de mańyzdy. Endigi kezekte biz qolǵa alatyn reformalar – osy reformalardy aiaqtaýdy, jalǵaýdy kózdeidi. Bul reformanyń bári memlekettik basqarýdy jetildirýdi, jańǵyrtýdy kózdeidi, azamattardyń memlekettik institýttarǵa senimin nyǵaitýdy, ekonomikany ártaraptandyrýdy maqsat tutady. Biz qazir aldymyzda buryn-sońdy elimiz kórmegen syn-tegeýrinder turǵanyn túsinemiz. Sol sebepti belgili bir reformalar beiimdelýdi talap etedi. Sol sebepti Úkimette sheshim qabyldaýdyń óte yńǵaily júiesin qurýdy tapsyrdy», - deidi ol.
Eske sala ketsek, búgin Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysy ótken bolatyn. Jiynda Qazaqstan Respýblikasynyń 2025 jylǵa deiingi ulttyq damý josparyn ázirleý, Memlekettik josparlaýdyń jańa júiesi, Memlekettik basqarýdy damytýdyń 2030 jylǵa deiingi tujyrymdamasy, 2021-2025 jyldarǵa arnalǵan jekeshelendirý josparynyń jobasy, sondai-aq, Jedel reformalar paketi jáne ulttyq halyq sanaǵyn ótkizý máseleleri qarastyryldy. Otyrysta Prezident memlekettik basqarýdy damytý úshin is-qimyldar josparyn qabyldaýdy tapsyrdy.
