2025 jylǵa qarai Qazaqstan ishki naryqty qus etimen tolyqtai qamatamasyz etedi. Bul týraly IH halyqaralyq qus ósirýshiler forýmynda QR Aýyl sharýashylyǵy birinshi vitse-ministri Aidarbek Saparov aitty, dep habarlaidy QazAqparat.
«2025 jylǵa qarai qus eti boiynsha importty tolyqtai otandyq ónimmen almastyrý josparlanǵan. Bul turǵyda jańa qus fabrikalary salynyp, qazir qoldanysta turǵandary jańǵyrtýdan ótedi», - dedi Saparov.
Onyń aitýynsha, 2021 jyldyń qorytyndysy boiynsha 8 qus fabrikasy paidalanýǵa berilgen. Jobalardyń jalpy quny 40 mlrd teńgeni qurady. Al jańadan qurylǵan jumys oryndary 500-ge jýyqtaǵan.
Óz kezeginde Qazaqstan qus ósirýshileri odaǵynyń prezidenti Rýslan Sháripov elimizdiń birneshe óńirinde fabrikalar salynyp jatqanyn aitty.
«Meniń oiymsha, aldaǵy eki-úsh jylda qus etimen ishki naryqty tolyqtai qamtamasyz etemiz. Sonymen qatar, úirek pen qaz ósiretin sharýashylyqtar da elimizde birtindep damyp kele jatyr», - dedi Sháripov.
Biyl Qazaqstanda qus ósirý salasynda oń kórsetkishter baiqalyp otyr.
Buǵan deiin habarlanǵandai, qus jeminiń qymbattaýyna bailanysty qus ósirýshiler qiyndyqqa tap bolǵan.
«Qus jeminiń bir tonnasy 180-190 myń teńgege jetti. Qus eti men jumyrtqanyń ózindik qunynyń 70 paiyzy jemniń baǵasyna qatysty bolady. Eger qus jemi arzan bolsa, onda bizdiń ónim de naryqqa tómen baǵamen shyǵady», - dedi Sháripov.
