Ortalyq kommýnikatsiialar qyzmetinde «Qazgidromet» RMK Gidrometortalyǵynyń direktory Marina Shmidt 30 sáýir - 2 mamyr aralyǵynda qandai aýa raiy kútiletinin aitty, dep habarlaidy "Ult aqparat" «Qazgidromet» RMK baspasóz qyzmetine silteme jasap.
Mereke qarsańynda, 30 sáýirde, Qazaqstannyń basym bóliginde aýa raiy qubylmaly bolady, jaýyn-shashyn, soltústik aimaqtarda arty qarǵa ulasatyn jańbyr jáne burshaq jaýady, ekpindi jel soǵady, qysqa merzimge jylyǵanymen kún qaita sýytady:
batysta túnde -2+5°S, kúndiz +7+15°S;
soltústik-batys jartysynda túnde -5,+5°S, kúndiz +15+20°S-tan +2+10°S deiin tómendeidi;
qalǵan aimaqtarda naizaǵai jarqyldap jańbyr jaýady, biraq jyly aýa raiy +15+25°S saqtalady.
Batys óńirlerde 1 mamyr merekesinde aýa raiy jaýyn-shashynsyz bolady, kúndiz aýa temperatýrasy +10+20°S deiin jylidy.
Soltústik, ortalyq jáne shyǵys óńirleriniń turǵyndary úshin aýa raiy qolaisyz bolady, jaýyn-shashyn (jańbyr, qar) saqtalady.
Elimizdiń shyǵysynda ekpindi jel soǵyp, nóser jaýady, túnde jáne tańerteń kóktaiǵaq pen tuman kútiledi. Túnde aýa temperatýrasy -2-7°S, kúndiz +3+11°S bolady.
Qazaqstannyń ońtústigi men ońtústik-shyǵysynda jańbyr jaýyp, kei jerlerde kún kúrkirep, burshaq jaýyp, jel kúsheiedi. Aýa temperatýrasy túnde +2+10°S shamasynda, jer betinde 3 gradýsqa deiin úsik bolady, kúndiz +12+20°S.
2 mamyrdan bastap elimizdiń batys jartysynda jaýyn-shashynsyz aýa raiy, shyǵys jartysynda áli de kei jerlerde jaýyn-shashyn, ońtústikte naizaǵai jáne ekpindi jelmen jańbyr saqtalady. Elimizdiń batysy men ońtústiginde aýa temperatýrasy kúndiz +15+25°S, soltústiginde, ortalyǵy men shyǵysynda +5+15°S bolady.
