Sinoptikter Qazaqstanda 30 naýryz - 1 sáýir aralyǵynda aýa raiy qandai bolatynyn aitty, dep habarlaidy "Ult aqparat".
«Kóktemgi kún sáýlesiniń artýyna bailanysty aýa temperatýrasy jyldam kóterilýde. Qazaqstannyń búkil aýmaǵy qar jamylǵysynan tazardy deýge bolady. Tek qiyr soltústik oblystarda, shyǵys jáne ońtústik-shyǵys óńirlerdegi taýly aýdandarda ǵana qaldy. Biraq ol da jyldam erip jatyr», - delingen «Qazgidromet» habarlamasynda.
Kóktemdegi tsiklondar men antitsiklondardyń jyldam aýysýyna bailanysty aýa raiy da qubylmaly bolady. Sondyqtan aldaǵy úsh kúnde Qazaqstannyń ońtústiginde jańbyr jaýyp, naizaǵai oinaidy, al kei óńirlerde qysqa ýaqytqa bolsa da, kún jaýyn-shashynsyz, jyly bolady.
