Eýraziialyq integratsiia institýtynyń sarapshysy Samat Nurtaza Prezidenttiń Májilis jáne máslihat depýtattarynyń sailaýy týraly úndeýine qatysty pikir bildirdi, dep habarlaidy QazAqparat.
«Osy sailaý zańdy júzde josparlaǵan ýaqytynda bolyp jatyr. Ekinshiden Prezidenttiń úndeýin oqi otyryp, parlamenttik oppozitsiiaǵa óte kóp jeńildik jasalǵanyn kórip otyrmyn. Kádimgidei parlamenttik oppozitsiia bolyp bilikti synaityn, bilikke jón úiretetin, kemshilikterin baiqap, aita alatyn organ paida boldy deýge bolady. Iaǵni parlamenttik opozitsiiaǵa berilip otyrǵan múmkindikter bizdiń elimizdiń demokratiialyq baǵytta kele jatqanyn aiǵaqtaidy. Sondyqtan meniń oiymsha bul degenimiz – naǵyz liberalizatsiianyń belgisi. Prezidenttiń búgingi úndeýi túsingen adamǵa kóp nárseni ózgertedi», - dedi Samat Nurtaza telefon arqyly bildirgen pikirinde.
Eske sala ketsek búgin Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialaǵan bolatyn.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy», - dedi Prezident úndeýinde.
