Foto: w-dog.ru
Sinoptikter 27-29 sáýirge arnalǵan aýa raiy boljamyn usyndy, - dep habarlaidy "Ult aqparat".
Qazgidromet boljamy boiynsha, aldaǵy táýlikte soltústik-batys tsiklonynyń atmosferalyq frontal bólikteri yqpalynan batysta, soltústik-batysta, odan keiin shyǵysqa aýysqan saiyn soltústik, ortalyq jáne shyǵys oblystarda naizaǵai oinap, jańbyr jaýady dep kútiledi. Respýblika boiynsha jel kúsheiip, batys jáne ońtústik oblystarda qumdy daýyl kútiledi.
"Kúndiz aýa temperatýrasy birtindep kóteriledi: batys óńirlerde 23-33 gradýsqa deiin, ońtústikte 27-35 gradýsqa deiin, ońtústik-shyǵysta 23-30 gradýsqa deiin. Eldiń qalǵan aýmaǵynda 27-28 sáýirde qazirgi temperatýralyq fon saqtalady, alaida 29 sáýirde túnde 2-10, kúndiz 10-18 gradýsqa deiin tómendeidi", - delingen habarlamada.
