© Sputnik / Vladislav Vodnev
"Qazaqstan halqyna" qory qaiyrymdylyq uiymdarynyń biryńǵai platoformasy arqyly alaiaqtyq áreketterdiń kóbeigenin málimdedi, dep habarlaidy Sputnik Qazaqstan.
Qordyń resmi ókili Álibek Ábdilovtyń aitýynsha, alaiaqtar qazaqstandyqtar atynan nesie rásimdeýge tyrysyp jatady.
Demalys kúnderi "Atameken" palatasynyń bailanys ortalyǵyna 250 adam shaǵymdansa, dúisenbi, 7 aqpanda bir kúnniń ishinde 186 shaǵym túsken.
"Máselen, Shymkent turǵyny atamekenim.kz saitynda kómekke ótinish berip, barlyq málimetterdi toltyrǵannan keiin ekranda nesieniń sátti óńdelgeni týraly aqparat paida bolǵan. Sodan keiin oǵan odan ári aqshalai nesie rásimdeý týraly usynyspen beine qońyraý tústi. Dál osyndai oqiǵa Óskemen qalasynda boldy. Onda qala turǵynyna elektrondy úkimettiń jalǵan portaly atynan SMS habarlama jiberilip, odan keiin aqshalai kómek túrinde 1 166 000 teńge alý úshin joldanǵan SMS kodyn ataýdy suraǵan alaiaq telefon soqqan", - deidi Ábdilov.
Buǵan deiin "Qazaqstan halqyna" qory atynan telefon soqqan alaiaqtar 42 500 teńge kólemindegi áleýmettik járdemaqy beremiz dep, halyqty aldaǵan.
"Qor messendjerler arqyly beine nemese aýdio qońyraýlar jasamaidy. Jalǵyz bailanys quraly – qazaqstanhalqyna.kz saity jáne atamekenim.kz qaiyrymdylyq uiymdarynyń biryńǵai platformasy. Biz azamattardy qaýesetterge senbeýge jáne alaiaq uiymdardyń arandatýyna túspeýdi suraimyz. Tek resmi aqparatqa senińiz", – dedi qordyń resmi ókili Álibek Ábdilov.
Qor mamandary alaiaqtyq faktileri týraly basqa adamdarǵa da eskertýdi surady.
