Foto: Úkimet
Premer-ministrdiń orynbasary Qanat Bozymbaev Almaty oblysyna resmi jumys sapary aiasynda Alatau City megajobasynyń tórt negizgi aimaǵynda – Gate, Golden, Growing jáne Green aýdandardyń qurylysqa daiyndyq barysyn tekserip, birqatar tapsyrma berdi, dep habarlaidy Ult.kz.
Ónerkásiptik-logistikalyq jáne iskerlik ortalyqtan bastap, ǵylymi-bilim berý men týristik klasterlerge deiin ár aýdannyń ózindik baǵyty bar.
Gate District Ótegen batyr, Pokrovka, Qoianqus, Yntymaq jáne Jańalyq eldi mekenderiniń arasynda ornalasqan. Munda PepsiCo, Caspian Group, Almaty jeldetkish zaýyty siiaqty iri jobalar júzege asyrylýda.
Aýdannyń basty ortalyǵy – Iconic Building-1 Halyqaralyq biznes damytý ortalyǵy bolmaq. Qanat Bozymbaev ÓQM, oblys ákimdigi jáne investorlarǵa bul ǵimarattyń qurylysyn jedeldetýdi tapsyrdy. Onyń aitýynsha, bul nysan Alatau City jobasynyń resmi bastamasynyń simvolyna ainalmaq.
Golden District Kishi Almaty jáne Qaskeleń ózenderiniń arasyndaǵy tasjol boiynda ornalasqan. Bul aimaq ǵylym, bilim jáne meditsina ortalyǵy retinde damytylmaq. Munda: K-Park mádeni-biznes kesheni, halyqaralyq bilim berý ortalyǵy, zamanaýi akademqalashyq, kópsalaly meditsinalyq klaster boi kóteredi. Sonymen qatar Hyundai Green Food Almaty jáne Mars siiaqty álemdik kompaniialardyń jobalaryn júzege asyrý josparlanǵan.
Growing District Almaty – Qapshaǵai avtojoly boiynda jáne Jetigen – Qazybek temirjol jelisiniń mańynda ornalasady. Bul aimaq eksportqa baǵyttalǵan óndiristik jáne logistikalyq ortalyq retinde damytylady.
Kólik dálizderiniń toǵysynda ornalasýy jáne áýejaiǵa jaqyndyǵy ekologiialyq taza óndiristerdi damytýǵa erekshe múmkindik beredi.
Foto: Úkimet
Qanat Bozymbaev bul jerde halyqaralyq Rhenus Logistics kompaniiasynyń basshylyǵymen kezdesip, Alataýda kólik-óndiristik hab qurýdaǵy yntymaqtastyq máselelerin talqylady.
Aýmaǵy 31 730 gektardy quraityn Green District Qapshaǵai sý qoimasymen, Qaskeleń ózenimen jáne Qonaev qalasymen shektesedi. Munda kýrorttyq aimaqtar men saiabaqtar salynyp, bolashaqta Formýla-1 jarys tasjoly, Iconic Building-2 týristik ortalyǵy boi kóteredi.
Bul aimaq Almaty aglomeratsiiasynyń basty týristik jáne demalys ortalyǵyna ainalmaq.
Jumys sapary barysynda Qanat Bozymbaev ministrlikter ókilderi, investorlar, biznes qaýymdastyǵy, halyqaralyq sarapshylar jáne Prezidenttiń shtattan tys keńesshisi Vong Hen Fainnyń qatysýymen Jobalyq ofis otyrysyn ótkizdi.
Jiynda otandyq jáne sheteldik investitsiialardy qorǵaý, kelisimsharttardyń turaqtylyǵyn qamtamasyz etý, Qytaidyń CRDI kompaniiasymen birlesken keńes berý tetikteri, Alataý qalasynyń damý keńesin qurý jáne Alatau City Authority memlekettik qorynyń Jarǵysyn bekitý siiaqty máseleler qaraldy.
Sonymen birge Memleket basshysynyń Alataý qalasyn damytý jónindegi Jarlyǵynyń oryndalý barysy jáne «Alataý qalasynyń arnaiy mártebesi týraly» Konstitýtsiialyq zań jobasynyń oryndalý barysyn da talqylady.
Kezdesý qorytyndysy boiynsha Qanat Bozymbaev jaýapty memlekettik organdarǵa Alataý qalasyn damytýda keshendi tásil qoldanýdy jáne tiimdi úilestirýdi qamtamasyz etýdi tapsyrdy.
