Almatyda «Alash» partiiasynyń qurylǵanyna 100 jyl tolýyna orai «Aibynym Alash» atty shyǵarmashylyq kesh uiymdastyrylyp, onda Alash qairatkerleriniń óleńderi oqyldy.
Keshti Qazaqstan Jazýshylar odaǵy tóraǵasynyń orynbasary Ǵalym Jailybai ashty. «Alash arystarynyń keiingi urpaqqa qaldyrǵan murasy ushan-teńiz. Búgingi is-shara sol murany Almaty qalasynyń turǵyndaryna nasihattaý úshin ótkizilip otyr» dedi ol.
Atalǵan is-sharada Temirbek Júrgenov atyndaǵy Óner akademiiasynyń, Júsipbek Elebekov atyndaǵy Respýblikalyq estrada-tsirk kolledjiniń stýdentteri, Sátbaev ýniversitetiniń «Báisheshek» ádebi birlestiginiń ónerpazdary, Abai atyndaǵy Respýblikalyq mamandandyrylǵan daryndy balalarǵa arnalǵan qazaq tili men ádebietin tereńdete oqytatyn orta mektep-internattyń oqýshylary, jas aqyndar óner kórsetti. Olar Ahmet Baitursynov, Mirjaqyp Dýlatov, Maǵjan Jumabaev, Beiimbet Mailin, Sultanmahmut Toraiǵyrov syndy alash qairatkerleriniń óleńderin kompozitsiialyq qoiylym túrinde obrazben oryndady. Jas aqyndar toby alashtyqtarǵa, onyń ishinde Álihan Bókeihanov, Mirjaqyp Dýlatovtarǵa arnap óleńder oqydy. Shyǵarmashylyq kesh barysynda qonaqtarǵa alashtanýshy-ǵalym Bolat Múrsálim túsirgen «Alashtyń on ekinshi jeltoqsany» derekti filmi kórsetildi. Kórermender filmnen Mustafa Shoqai men Álimhan Ermekovtyń jandy daýsyn estip, bir tebirenip qaldy.
Alashordanyń bir ǵasyrlyq mereitoiyna arnalǵan keshti T.Júrgenov atyndaǵy Óner akademiiasynyń «Sahna tili» kafedrasynyń meńgerýshisi, professor, Qazaqstannyń eńbek sińirgen qairatkeri Dariǵa Turanqulova qorytyndy sózben aiaqtady. «Men sahna óneriniń mamany retinde, búgingi keshke óte joǵary baǵa beremin. Kóp jurt tek jeńil mýzykaǵa áýestenip jatqanda, sizderdiń osyndai saliqaly is-shara ótkizip jatqandaryńyz úlken eńbek. Sizderge barlyq kezde shyǵarmashylyq tabys tileimin» dep ol júrekjardy lebizin bildirdi.
Qatysýshylardyń barlyǵy keshten oljaly qaitty. Olardyń árqaisysyna ishinde 400-den astam tarihi fotolar jinaqtalǵan «Alashorda» fotoalbomy men Alǵys hattar tabys etildi. «Alashorda» fotoalbomynyń jaryqqa shyǵýyna «Samuryq-Qazyna» ál-aýqat qory demeýshilik jasady.
Sonymen qatar shyǵarmashylyq kesh aiasynda Qazaqstan Respýblikasy Ulttyq kitaphanasynyń qoldaýymen «Alash» partiiasynyń júz jyldyq mereitoiyna orai kitap kórmesi ótkizildi. Kórmege alash arystarynyń ózderi jazǵan eńbekter men búgingi ǵalymdardyń alashtaný taqyrybynda qurastyrǵan júzdegen kitaptary qoiyldy.
Aita keteiik, «Aibynym Alash» atty shyǵarmashylyq keshti Almaty qalasy Ishki saiasat basqarmasynyń tapsyrysy boiynsha «El-shejire» qoǵamdyq qory uiymdastyrdy.
