Premer-ministr sońǵy jyldarda búkil álemde azyq-túlik taýarlaryna degen suranys pen onyń baǵasy kúrt ósip kele jatqanyn aitty. Sondyqtan otandyq aýyl sharýashylyǵy ónimderin óndirý men qaita óńdeý arqyly ishki naryqty azyq-túlik taýarlarymen qamtamasyz etý birinshi orynǵa shyǵyp otyrǵanyn túsindirdi.
"Aýyl sharýashylyǵy ónimderin shyǵarýdy ulǵaitý kerek jáne importqa táýeldilikti barynsha qysqartý qajet. Memleket basshysy aǵymdaǵy syn-qaterler men táýekelderdi eskere otyryp, azyq-túlik qaýipsizdigin qamtamasyz etýdiń mańyzdylyǵyn birneshe ret atap kórsetti.
Osyǵan bailanysty tiisti jospar ázirlengen bolatyn. Qazirgi jaǵdaida bul qujattyń mańyzdylyǵy odan saiyn arta túskenin kórip otyrmyz", - dedi ol.
Sondyqtan azyq-túlik taýarlarynyń naqty qoljetimdi bolýy, dúkender men bazarda jetkilikti kólemde bolýy basty mindet bolyp otyr.
Álihan Smaiylov azyq-túlik qaýipsizdigin qamtamasyz etý úshin qandai sharalar qajet ekenin aitty.
"Baǵany retteýdiń qoldanystaǵy mehanizmderiniń tiimdiligin baǵalaý kerek. Sondai-aq baǵalardy ákimshilik retteýden halyqtyń áleýmettik osal toptaryn adrestik qoldaýǵa kóshý úshin usynystar daiyndaý qajet.
Baǵalardy ákimshilik mehanizmdermen ustap turý naryqtyq tásilderge jatpaitynyn bilemiz, sondyqtan baǵalardy turaqtandyrýdyń basqa da ádisterin qoldaný qajet.
Sonymen birge, jospar aiasynda forvardtyq jetkizýler júiesin damyta otyryp, agroónerkásip kesheni jáne saýda sýbektileriniń arasynda uzaq merzimdi turaqty sharýashylyq bailanystardy ornatý sharalaryn da qarastyrý kerek", - dedi premer-ministr.
Azyq-túlik qaýipsizdigin qamtamasyz etýde shyǵarylatyn tamaq ónimderiniń sapasy da mańyzdy oryn alatynyn aitty.
"Bul baǵytta veterinarlyq jáne fitosanitarlyq baqylaý, tamaq ónimderin sertifikattaý jumystaryn jetildirýdiń mańyzy zor. Sondai-aq, agrarlyq ǵylymdy damytý qajet", - dedi ol.
Ǵylymi-zertteý protsesteriniń integratsiiasyn, kadr daiyndaý jáne ǵylymi jetistikterdi óndiriske engizýdiń qamtamasyz etilýi tiis ekeni de atap ótildi. "Bul úshin Josparda agrarlyq ýniversitetter bazasynda quramyna agrarlyq ǵylymi institýttar men tájiribelik sharýashylyqtardy qosa otyryp, zertteý ortalyqtaryn qurý boiynsha naqty mindetterdi qarastyrý qajet" dedi ol.
Josparda kózdelgen is-sharalar óńirlik damý josparlarynda da qamtylýy kerek ekeni aityldy.
"Oblys ákimderine azyq-túlik qaýipsizdigin qamtamasyz etý boiynsha naqty KPI bekitilýi tiis.
Aýyl sharýashylyǵy ministrligine qujatty pysyqtap, Úkimet sheshiminiń tiisti jobasyn ázirleýdi tapsyramyn. Baqylaý Roman Skliarǵa beriledi", - dedi Smaiylov.
