Almatydaǵy ál-Farabi dańǵylynda úsh adamnyń ómirin qiǵan jol apatyna qatysty qozǵalǵan qylmystyq isterdiń biri toqtatyldy, dep habarlaidy ult.kz.
Áńgime apatqa kináli dep tanylǵan Zeekr júrgizýshisimen birge bolǵan tórt adamnyń ústinen qozǵalǵan is týraly bolyp otyr. Olar kúdiktiniń alkogol ishpegenin aityp, tergeý barysynda jalǵan kýálik berdi degen kúdikke ilingen.
Marqumdardyń týystarynyń múddesin qorǵaǵan zańger Meiirman Shekeevtiń aitýynsha, atalǵan tulǵalar bastapqyda júrgizýshiniń mas bolmaǵanyn málimdegen. Alaida keiin meditsinalyq saraptama onyń alkogoldik masań kúide bolǵanyn rastaǵandyqtan, bul derek boiynsha Qylmystyq kodekstiń 420-baby ("Kórineý jalǵan aiǵaq berý") negizinde jeke qylmystyq is tirkelgen.
Degenmen Ishki ister ministrligi júrgizgen tergeý nátijesinde kúdiktilerdiń áreketinen qylmystyq quqyqbuzýshylyq quramy anyqtalmaǵan.
"Qylmystyq is boiynsha óndiris qylmystyq quqyqbuzýshylyq quramynyń bolmaýyna bailanysty toqtatyldy", – dep habarlady vedomstvo.
Sonymen qatar qabyldanǵan sheshimniń zańdylyǵyn prokýratýra tekseretini belgili boldy.
Eske salsaq, 21 naýryzǵa qaraǵan túni ál-Farabi dańǵyly men Meńdiqulov kóshesiniń qiylysynda Zeekr 001 jáne Mercedes-Benz kólikteri soqtyǵysqan. Apat saldarynan Mercedes júrgizýshisi men eki jolaýshy qyz oqiǵa ornynda qaza tapty.
Tergeý derekterine sáikes, Zeekr júrgizýshisi apat kezinde alkogoldik masań kúide bolǵan jáne soqtyǵysar aldyndaǵy jyldamdyǵy saǵatyna 219 shaqyrymǵa jetken.
Qazir negizgi is boiynsha júrgizýshi Qylmystyq kodekstiń 345-1-baby 4-bóligi boiynsha sot aldynda jaýap berip jatyr. Atalǵan bap 7 jyldan 10 jylǵa deiin bas bostandyǵynan aiyrý jazasyn kózdeidi.
