Búgin Astanada bastalǵan Álemdik jáne dástúrli dinder kóshbasshylarynyń VI sezinde Ál-Azhardyń (Mysyr) Bas imamy Sheih Muhammad Ahmad at-Taieb terrorizmniń týyndaýy men taraýy týrasynda óziniń oi-paiymymen bólisti, dep habarlaidy QazAqparat tilshisi.
«Oilap otyrsańyz, terrorizmniń resýrstary, qarýlanýy, alapat kúshpen bir shekaradan ekinshisine emin-erkin ótip ketip, tutqiyldan shabýyldaýy - oǵan islam áleminiń muryndyq bolyp otyrǵanyna kúmán týdyrady», - dedi Sheih Muhammad Ahmad at-Taiebtiń.
Onyń atap ótýinshe, terrorizmniń musylmandarǵa telinýi - tek betperde ǵana.
«Álbette, áreket alańy islamdyq, arabtyq alańda ótip jatqanyn bilip otyrmyz. Sondai-aq, bul oiynda arabtar men musylmandar zardap shegip jatyr. Al túptep kelgende rejissýrada arabtyq nemese islamdyq qatysý baryna anyq kúmánimiz bar. Islamnyń atyn jamyla otyryp, terrorizm arab álemine úlken soqqy berdi. Osynyń saldarynan musylmandarǵa úreimen qaraityn kózqaras qalyptasty», - deidi ol.
Sheih Muhammad Ahmad at-Taieb terrorizm eshqandai ultqa da, dinge de bólinbeitinin atap ótti.
«Terrorizmdi islam da, hristiandyq ta, iýdaizm de oilap tapqan joq. Ol - halyqaralyq saiasattyń adasyp ketken ádiletsiz balasy ispetti. Ol eshkimdi bala dep, úlken dep bólmei qatygezdigin jasai beredi», - deidi Mysyrdyń Bas imamy.
Óz sózine dálel retinde ol birneshe statistikalyq málimet keltirdi.
«Eýropadaǵy «ekstremistik islamizm» dep atap ketken qubylystyń statistikalyq málimetterine kóz júgirttim. Siriia men Irakqa tartylǵan eýropalyq jastardyń kóbi din jolynda bolmaǵanyn oqydym. Oilap qarańyz, statistikalyq málimet boiynsha eýropalyq 400 otbasydan Siriia men Irakqa jastar ketken. Olardyń 40 paiyzy dini senimde bolmaǵan. Iaǵni, olar - ateister. Qalǵan 40 paiyzy katolitsizmdi ustansa, 19 paiyzy ǵana musylman, 1 paiyzy iýdei bolǵan. Osylaisha, bul jerde másele islam dinindegi jastarda nemese islam jihadynda emes ekenin ańǵara berińiz. Bul ádiletsizdiktiń belgisi. Qazirgi órkeniette dini qundylyqtar men normalardyń joqtyǵy baiqalady», - deidi ol.
Eske salaiyq, elordada QR Prezidenti Nursultan Nazarbaevtyń tóraǵalyǵymen Álemdik jáne dástúrli dinder kóshbasshylarynyń VI sezi ótip jatyr.
