Batys Qazaqstan oblysynda Qazaqstan halyq jazýshylary, aqyndar, Memlekettik syilyqtyń laýreattary Juban Moldaǵalievtiń 100, Qadyr Myrza Álidiń 85 jyldyǵyna arnalǵan mereitoilyq sharalar ótýde, dep habarlaidy "Ult aqparat".
Juban aqynnyń ǵasyrlyq mereitoiy týǵan jeri - Aqjaiyq aýdanynda bastaldy.
Aldymen meimandar Saiqudyq aýylyndaǵy aqyn atyndaǵy mektepke bet túzedi. Sodan keiin Juban aýylyndaǵy Talap orta mektebinde aqyn synyby ashyldy.
Negizgi sharalar aýdan ortalyǵy - Chapaev aýylynda ótti.
Osynda Juban ortalyǵynyń ashylý rásimine qatysqan BQO ákiminiń birinshi orynbasary Muhtar Mankeev eli barda, azamatyn qúrmetteitin halqy barda Juban aqynnyń máńgi jasaitynyn jetkizdi.
«Esimi alty alashtan asyp, «Men - qazaqpyn!» dep barsha álemge jar salǵan aqynnyń esimi umytylmaq emes. Akademik Zeinolla Qabdolov: «Juban - qazaq poeziiasyndaǵy, ádebietimizdegi iri qubylys. Ol - Oraldyń ǵana emes, qazaqtyń Jubany» degen bolatyn. Juban eli aqyn murasyn úlgi etip, keler ǵasyrlarǵa da jalǵaityny anyq», dedi M.Mankeev.
Almatydan arnaiy kelgen aqynnyń jary Sofiia Málikqyzy Juban eline shynaiy rizashylyǵyn jetkizdi.
«Men 1947 jyly osy elge kelin bolyp tústim. Qalanyń qyzy bolsam da, aýyldyń barlyq sharýasyn istedim. Men kóp bata alǵan adammyn. Osy kúnge de jetip otyrǵanym - sonyń arqasy dep oilaimyn», dedi ol.
«Biz Juban aǵanyń kózin kórip, sózin estigen urpaqpyz. Qyran qabaqty, báiterektei boiymen, sańqyldaǵan daýsymen óleń oqyǵan sáti, óziniń susymen, mysymen basyp turatyn aqyn kelbeti áli kóz aldymyzda. Ol kisi Qazaqstan Jazýshylar odaǵyn basqaryp turǵan kezde meni múshelikke qabyldaǵany esimnen ketpeidi. Jubaǵań burynǵy Odaq dúrkirep turǵan dáýirde Rasýl Gamzatov, David Kýgýltinov, Edýardas Mejelaitis, Mustai Kárim siiaqty uly aqyndarmen terezesi teń, qatar júrgen eń betke ustar aqyndarymyzdyń biregeii boldy. Bizdiń usynysymyzben Juban Moldaǵalievtiń 100 jyldyǵy halyqaralyq TÚRKSOI uiymynyń biylǵy «Túrki mádenietiniń kúntizbesine» de engizilip, keńinen atalyp ótiletin boldy. Osydan on jyl buryn aýdan ortalyǵynda eńseli eskertkishi boi kóterse, búgin Juban ortalyǵy ashylyp otyr. Munda kelgen adam ádebiet álemine engendei bolady. Dizainy ádemi, biik talǵammen jasalǵan. Juban sýretteri de airyqsha kóz tartyp tur», dedi mereitoiǵa arnaiy kelgen aqyn, Memlekettik syilyqtyń laýreaty, Qazaqstan Jazýshylar odaǵynyń basqarma tóraǵasy Ulyqbek Esláýlet.
Aqyn, Memlekettik syilyqtyń laýreaty, Qazaqstan Jazýshylar odaǵy BQO filialynyń tóraiymy Aqushtap Baqtygereeva 21 jasynda qazaqpyn dep óleń jazyp, sol rýhty keýdesinde óshirmei, 43 jasynda ólmes poemaǵa ainaldyrǵan aqyn rýhynyń máńgi óshpeitinin aityp, Juban ortalyǵyn salýǵa úles qosqan kásipker azamattarǵa alǵysyn jetkizdi.
Kompozitor, jazýshy, Qazaqstannyń eńbek sińirgen qairatkeri Ilia Jaqanov aqynmen shyǵarmashylyq bailanysta bolǵandyǵy jóninde esteligimen bólisip, atyraýlyq sýretshi Qambar Amanov salǵan «Edil-Jaiyq» týǵan kún» atty kartinany Juban ortalyǵyna syiǵa tartty.
Qadyr aqynnyń 85 jyldyq mereitoiy týǵan jeri - Syrym aýdanynda bastaldy.
Qos aqynǵa arnalǵan sharalar búgin Oral qalasynda jalǵasady.
