Elbasy Nursultan Nazarbaevtyń «Rýhani jańǵyrý» baǵdarlamasy kóptegen igi istiń oryndalýyna jol ashty. Sondai aýyz toltyryp aitar dúnieniń biri – búginde 165 jyldyq mereitoiy toilanǵaly otyrǵan Aqyn Saranyń portreti Máskeýdegi múzeiden ákelindi. Jetisýdyń maqtanyshy bolǵan aldúzik aqynnyń kópke jariia bolmaǵan kórkem beinesi kópti eleńdetkeni de ras.
Osyǵan orai, Taldyqorǵan qalasyndaǵy Muhamedjan Tynyshpaev atyndaǵy Almaty oblystyq tarihi-ólketaný mýzeiinde jádigerlerdi kórýge arnalǵan shara ótti. Igi bastamany «NAQ-Birlik» qoǵamdyq uiymy men oblystyq Qazaqstan halqy Assambleiasy birlese otyryp júzege asyrdy.
Sharada Almaty oblystyq mádeniet, arhivter jáne qujattama basqarmasynyń basshysy Aqan Ábdýáliev sóz alyp, atalǵan bastamanyń mán-mańyzy jaiynda toqtalyp ótti.
– Halqymyzda: «Sengenińnen súieneriń myqty bolsyn», – degen ataly sóz bar. Búginde artynda qalǵan urpaǵy Sara Tastanbekqyzynyń joǵyn joqtaýda. Súieneriniń myqty ekeni osydan-aq belgili. Ótkendi jandandyrý arqyly bolashaqqa bararymyz belgili. «Rýhani jańǵyrý» baǵdarlamasy aiasynda qolǵa alǵan bul jumystyń bolashaq úshin bereri mol. Endeshe, syrt elden ákelingen qundy dúniemiz eldiń bolashaǵyna qyzmet etsin, – dep sózin túiindedi mádeniet salasynyń basshysy.
Atalmysh jádigerlerdi murajaiǵa músinshi Margarita Vashenko ótkizgen. Ol kezinde Taldyqorǵan oblysynyń bas sáýletshisi bolǵan. Sol jyldary Margarita Vashenko Aqsý aýdanynyń Kóshkental aýylyna jáne Jansúgir eldi mekenine Sara Tastanbekqyzynyń eskertkishin ornatady. Ózi ómirden óterde qyzy Geliia Timofeevaǵa Aqyn Saranyń portretin, qujattaryn qazaq eline jetkiz dep amanat aitady.
«NAQ-Birlik» qoǵamdyq qorynyń tóraǵasy Oralbek Jaqiianov Margarita Vashenkonyń qazaq elin sheksiz súigen jan ekenin, onyń elge degen qurmetin Aqyn Saraǵa eskertkish ornatýy jáne Máskeýdegi jádigerlerdi elge jetkizý jaily qyzyna aityp ketken amanatynan ańǵarýǵa bolatynyn aita kelip:
– Qazaq qyzdarynyń teńdigin jyrlaǵan aqyn murasyn elge jetkizýde úlken eńbek sińirgen Saltanat Dáýlethanqyzyna rahmet aitýymyz kerek. Ol shetel muraǵatynan 12 qundy jádigerdi shashaý shyǵarmai elge jetkizip, búgin ólketaný mýzeiine tabystap otyr, – dedi Oralbek Jaqiianov.
Osy rette, ataqty tulǵanyń jádigerlerin ákelýge atalǵan qoǵamdyq qor tóraǵasynyń da kóp kúsh jumsaǵanyn aita ketken abyzal. Aitalyq, elshilikpen kelisý, muraǵattan qundy jádigerlerdi alý, sonymen qatar, amanatty jetkizýshi Saltanat Meńlibaevanyń baryp-kelýin qamtamasyz etýdiń bilgen adamǵa ońai sharýa emes ekeni de anyq-ty.
Qozybai QURMAN,
Almaty oblysy.
