Qazaqstanda aqyly jol qyzmetin paidalanatyn jolaýshylar tarifti aldyn ala onlain tólese, olarǵa 50 paiyz jeńildik qarastyrylǵan. Bul týraly «QazAvtoJol» ulttyq kompaniiasynyń aqy tóleý beketiniń aǵa operatory, kassir Eldos Mákenov málim etti, dep habarlaidy QazAqparat tilshisi.
«Biz qazir Jibek joly aqy tóleý beketinde turmyz. Avtojol 8 jolaqtan turady. Bekette 3 operator jolaýshylardyń aqy tóleý protsesi men qaýipsizdigin qadaǵalaidy. Qajet jaǵdaida jolaýshylarǵa aqyly jolǵa qatysty protsesterdi túsindiremiz, saýaldaryna jaýap beremiz. Bizdiń basty maqsat – avtokólikterdiń kedergisiz júrýin qamtamasyz etý jáne jolaýshylarǵa konsýltatsiia berý. Bizde aqyly joldar boiynda bekettiń 2 túri bar. Biri operator arqyly qadaǵalansa, ekinshi túrinde onlain baqylaidy, beketten shlagbaým arqyly ótedi», - dedi Eldos Mákenov «QazAvtoJol» ulttyq kompaniiasy uiymdyrǵan baspasóz týrynda.
Onyń aitýynsha, jol aqysyn aldyn ala tóleýge nemese sol jerde qolma qol tóleýge de bolady.
«Aqyly joldyń qunyn túrli mobildi qosymshalardyń kómegimen tóleýge bolady. Odan bólek, bir jyldyq abonoment satyp alý múmkindigi de bar. Tarifke kelsek, ár jol ýchaskeniń baǵasy ártúrli. Qazir biz «Nur-Sultan – Temirtaý» baǵytyndaǵy tasjolda turmyz. Sonymen qatar tólem kóliktiń túrine 3-ke bólinedi. Ol aýyr júk kóligi, gazel jáne jeńil avtokólikter. Tiisinshe baǵalary da ártúrli. Jalpy sany 7 tarif túri bar. Baǵaǵa kelsek, jeńil avtomobil úshin eger jolaýshy aqyly jol aýmaǵyna jetpei turyp, aldyn ala tólese 200 teńge, al beketke kelip, sol jerde tólese, onda 400 teńge. Demek aldyn ala tóleseńiz 50 paiyz jeńildik qarastyrylǵan. Bul jolaýshylar úshin tiimdi dep oilaimyn», - deidi ol.
Atalǵan beketke táýlik boiy 3 operator, 1 kassir jáne 1 elektrik jumys istep, aqyly joldyń qyzmetin qamtamasyz etedi.
«Qystygúni jumys kúnderi táýligine 3 myńnan 4 myńǵa deiin, al demalys kúnderi 5 myńnyń shamasynda kólik júredi. Eger kólik júrgizýshisi beketten aqy tólemei ótip ketse, ol jaǵdai beinebaqylaý arqyly esepke alynady. Sodan soń kólik iesine aqy tóleý kerektigi týraly habarlama jiberiledi», - deidi operator.
