Mádeniet jáne sport ministri Aqtoty Raiymqulova ekonomikalyq soqqyny alǵashqylardyń biri bolyp sezingen týristik kompaniialarǵa qandai kómek kórsetiletinin aityp berdi, dep habarlaidy QazAqparat.
«Elimizde týristik salaǵa birshama qoldaý sharalary qolǵa alynýda. Memleket basshysy elimizdegi tótenshe jaǵdaiǵa jáne memlekettiń daǵdarysqa qarsy is-sharalaryna bailanysty jasaǵan arnaiy málimdemesinde biznes qaýymdastyqqa ekonomikalyq soqqy bolatynyn atap ótken edi. Bul rette týristik salanyń da ájeptáýir shyǵyn kóretini belgili. Dese de, bizdiń elimiz osy bir qysyltaiań shaqtan keiin týristik salanyń eńse tiktep ketýine yqpal etý úshin shaǵyn jáne orta bizneske qoldaý kórsetýdiń buryn-sońdy bolmaǵan sharalaryn qolǵa alyp otyr. Naqtyraq aitsam, shaǵyn jáne orta biznes ókilderi biylǵy birinshi qazanǵa deiin eńbekaqy tóleý qorynan ustalatyn salyqtan bosatylady. «Biznestiń Jol Kartasy – 2025» jáne «Qarapaiym zattar ekonomikasy» baǵdarlamasy aiasynda ekonomikanyń barlyq salasy úshin kómek-qarjy berilmek», - dedi ministr OKQ-da ótken baspasóz máslihatynda.
Aqtoty Raiymqulovanyń aitýynsha Memleket basshysy men Úkimettiń dál osy biznes ókilderine jasap jatqan qamqorlyǵyn, iaǵni salyqtan bosatý sharasyn qonaq úi biznesi men týrizm salasyndaǵy kásipkerlerge daǵdarystan keiingi kezeńge daiyndalý úshin berilgen múmkindik dep qarastyrǵan jón.
«Máselege tereńirek úńilsek, eldegi týristik salanyń damýyna dál osy týristik operatorlardyń qosar úlesi qomaqty. Óz aqshasymen qosa ár týristen alynǵan qarajattyń qomaqty somasyn qonaq úiler men áýe tasymaldaýshylaryna aýdarylady. Al álemde mynandai ahýal ornap, tutastai sala toqyrap qalǵanda, sol salǵan aqshany keri qaitarý mehanizmi ózge salalarǵa qaraǵanda erekshe. Olar búginde osy qarajatty qaitarý úshin óz seriktesterimen kelissózder júrgizýge. Al zań turǵysynan rásimderdi sheshýge tiisti ýaqyt qajet. Osyǵan bailanysty, azamattardan jaǵdaiǵa túsinýshilikpen qaraýdy jáne kúte turýdy suraimyz», - dedi ol.
«Týristik qyzmet týraly» Zańnyń 17-babyna sáikes týristerdiń qarajatyn týroperatorlar is júzinde shyǵarǵan shyǵyndaryn shegere otyryp qaitarady. Bolmasa týroperatorlar óz tarapynan týyndaǵan jaǵdaidan shyǵýdyń túrli joldaryn usynady. Olardyń arasynda demalys kúnderin aýystyrý múmkindigi bar. Iaǵni, sapardy basqa merzimge keiinge qaldyrýǵa bolady. Ministr eki taraptyń arasyndaǵy máseleni osyǵan uqsas joldarmen sheshýge bolatynyn aityp berdi.
